सहिद स्मारक ए डिभिजन लिगमा हिमालयन शेर्पा र नेपाल एपिएफ क्लबबीचको खेलमा आठ गोल भएको छ।
च्यासल मैदानमा भएको खेलमा जित भने शेर्पाले निकाल्यो। शेर्पाले ५-३ को अन्तरमा जित निकालेको हो।
शेर्पाका लागि सुदिप श्रेष्ठले आठौं मिनेटमा पहिलो गोल गरेका थिए। सत्यम् शर्माले २४ र २८ मिनेटमा गरी दुई गोल गर्दा शेर्पा आधा घन्टा बित्न नपाउँदै ३-० ले अघि रह्यो।
एपिएफका लागि अहमेद बेइडोमले पहिलो हाफको इन्जुरी टाइममा गोल गर्न सफल भए।
दोस्रो हाफ सुरु भए लगत्तै एपिएफका सनिष श्रेष्ठले गोल गर्दै खेल ३-२ को अवस्थामा ल्याए।
६२ मिनेटमा प्रदीप लामाले अर्को गोल गर्दा एपिएफले खेललाई ३-३ को बराबरीमा ल्याउन सफल भयो।
७५ मिनेटमा आबायोमी फाकुल्नेले गोल गर्दा शेर्पाले ४-३ को अग्रता लियो। ८८ मिनेटमा विश्वास श्रेष्ठले गोल गर्दा शेर्पा जिततर्फ अघि बढेको थियो।
जितसँगै शेर्पा ९ अंक जोड्दै नवौं स्थानमा उक्लिएको छ। एपिएफ ११ अंकसहित आठौं स्थानमा छ।
