इंग्लिस प्रिमियर लिगको नयाँ सिजनमा चेल्सीले सानदार विजयी सुरुवात गरेको छ ।
घरेलु मैदान स्टामफोर्ड ब्रिजमा शनिबार राति भएको खेलमा क्रिस्टल प्यालेसमाथि ३–० को सहज जित निकाल्दै यसै साता युरोपेली सुपर कप जितेको युरोपेली च्याम्पियन चेल्सीले नयाँ सिजनमा सुखद सुरुवात गरेको हो।
चेल्सीको जितमा मार्कोस अलन्सो, क्रिस्टियन पुलिसिच र ट्रिभो चलोवाहले गोल गरे।
खेलको २७औं मिनेटमा मार्कोस अलन्सोले फ्रिकिकमा सुन्दर गोल गर्दै चेल्सीलाई सुरुवाती अग्रता दिलाए। टेरिक मिट्चेलले मासन माउन्टलाई फल गरेपछि प्राप्त फ्रिकिकलाई अलन्सोले गोलमा परिणत गरेका थिए।
खेलको ४०औं मिनेटमा क्रिस्टियन पुलिसिसले गोल गर्दै चेल्सीको अग्रता दोब्बर पारे। उनले एज्पिलिक्वेटा दिएको क्रस पासलाई सदुपयोग गर्दै गोल गरेका हुन्।
पहिलो हाफसम्म २-० ले अघि रहेको चेल्सीले दोस्रो हाफमा थप एक गोल थप्यो।
खेलको ५८औं मिनेटमा ट्रेभो चलाबोहले गोल गर्दै चेल्सीले अग्रता तेब्बर पारेका थिए। माटियो कोभासिसको पासमा चलाबोह पेनाल्टी क्षेत्र बाहिरबाट गरेको प्रहार गोलमा परिणत भएको थियो।
त्यसपछि खेलमा गोल हुन नसक्दा चेल्सीले क्रिस्टल प्यालेसमाथि सहज जित निकालेको हो। जितपछि चेल्सीले पहिलो खेलबाट ३ अंक जोड्यो ।
