स्पेनिस ला लिगा फुटबलमा साविक विजेता एट्लेटिको मड्रिडले विजयी सुरुवात गरेको छ ।
सेल्टा भिगोलाई आइतबार राति २-१ गोल अन्तरले हराउँदै एट्लेटिकोले विजयी सुरुवात गरेको हो । एट्लेटिकोलाई जिताउन एन्जल कोर्रियाले दुबै गोल गर्दा सेल्टाका इयागो आस्पसले एक गोल फर्काए ।
खेलको २३ औं मिनेटमा कोर्रियाले गोल गर्दै एट्लेटिकोलाई सुरूवाती अग्रता दिलाएका थिए । पहिलो हाफसम्म १-० ले अगाडि रहेको एट्लेटिकोमाथि खेलको ५९ औं मिनेटमा इयागोले पेनाल्टीमा गोल गर्दै सेल्टालाई १-१ गोलको बराबरीमा फर्काए ।
त्यसपछि खेलको ६४ औं मिनेटमा कोर्रियाले व्यक्तिगत दोस्रो गोल गर्दै एट्लेटिकोलाई २-१ को जित दिलाए ।
खेलको इन्जुरी समयमा दुबै टोली १०-१० खेलाडीमा समेटिएको थियो ।
एट्लेटिकोका मारियो हेर्मोसो र सेल्टाका हुगो माल्लोले रातो कार्ड पाएर मैदानबाट बाहिरिएपछि दुबै टोलीले १०-१० खेलाडीमा खेल सकाएको थियो।
यस जितसँगै एट्लेटिकोले पहिलो खेलमा ३ अंक जोडेको छ ।
