इंग्लिस प्रिमियर लिग फुटबल अन्तर्गत लण्डन डर्बीमा चेल्सीले आर्सनललाई हराएको छ। चेल्सीले इमिरेट्स स्टेडियममा आइतबार भएको खेलमा घरेलु टोली आर्सनलमाथि २–० को सहज जित हात पारेको हो।
चेल्सीको जितमा रोमेलु लुकाकु र रिस जेम्सले गोल गरेका थिए।
दुवै गोल पहिलो हाफमा भएको थियो। खेलको १५औं मिनेटमा लुकाकुले गोल गर्दै चेल्सीले सुरूवाती अग्रता लिएको थियो।
यसै सिजन इटालियन च्याम्पियन इन्टर मिलानबाट चेल्सी आएका लुकाकुले आफ्नो डेब्यू खेलमै गोल गरेका हुन्।
३५औं मिनेटमा जेम्सले गोल गर्दै चेल्सीको अग्रता दोब्बर पारे। उनले मासन माउन्टको पासमा बायाँ कर्नरमा उत्कृष्ट गोल गरे।
योसँगै चेल्सीले लगातार दोस्रो खेलमा जित हात पार्दै २ खेलबाट ६ अंक जोडेर शीर्षस्थानमा उक्लिएको छ।
समान ६ अंक नै रहे पनि लिभरपुल, ब्राइटन र टोटेनहम गोल अन्तरमा पछि परेका छन्। आर्सनल अंकविहीन हुँदै पुछारमा छ।
