भ्यालेन्सिया र मालोर्काले स्पेनिस ला लिगामा अपराजित यात्रा कायम राखेका छन्। घरेलु मैदान मेस्टाला स्टेडियममा शुक्रबार राति भएको खेलमा भ्यालेन्सियाले डिर्पोटिभो अलाभेसलाई ३–० गोलले हरायो । अर्को खेलमा मालोर्काले स्पान्योललाई १–० गोलले स्तब्ध बनायो ।
जितसँगै भ्यालेन्सिया तालिकाको शीर्षस्थानमा उक्लिएको छ। तीन खेलमा अपराजित भ्यालेन्सियाले सात अंक बनाएको छ। समान सात अंक बनाएको मालोर्का दोस्रो स्थानमा उक्लिएको छ। मालोर्का गोल अन्तरका आधारमा पछाडि छ। भ्यालेन्सियासँग पराजित अलाभेस अंक बिहिन बन्दै तालिकाको अन्तिममा छ । दुई अंक बनाएको स्पान्योल १५औं स्थानमा छ ।
एकपक्षीय खेलमा भ्यालेन्सियालाई जिताउन ड्यानियल वास, कार्लाेस सोलेर र गोन्कालो गुइडेसले गोल गरे। पहिलो हाफमा दुई गोल गरेको भ्यालेन्सियाका लागि ड्यानियलले तेस्रो मिनेटमै खाता खोले । उनले डेनिस चेरिसेभको पासमा गोल गरेका थिए । पहिलो हाफको इन्जुरी समयमा कार्लोस सोलेरले गोन्कालो गुइडेसको पासमा गोल गर्दै घरेलु टोलीको अग्रता दोब्बर बनाए ।
६०औं मिनेटमा गोन्कालो गुइडेसले म्याक्सिमिलियानो गोमेजको पासमा गोल गर्दै भ्यालेन्सियालाई सहज जित दिलाए । भ्यालेन्सियाले ५२ प्रतिशत बल पोसेसनमा राखेको थियो । यता ४८ प्रतिशत बल पोसेसनमा राखेको अलाभेसले गोल फर्काउन सकेन । भ्यालेन्सियाका मिडफिल्डर कार्लोस सोलेर ‘म्यान अफ दी म्याच’ भए ।
घरेलु मैदानमा खेलिएको अर्को प्रतिस्पर्धात्मक खेलमा मालोर्कालाई जिताउन डानियल रोड्रिग्वेज नायक बने । डानियलले २७औं मिनेटमा स्पान्योलका डिफेन्सको कमजोरीमा गोल गरेका थिए । यता खेलको अन्तिममा १० खेलाडीमा समेटिएको स्पान्योल हार खेप्न बाध्य बन्यो । इन्जुरी समयमा सर्गी गोमेज सोझै रातो कार्ड पाउँदै बाहिरिएका थिए । मालोर्काका जापानी विङगर टेकफुसा कुबो ‘म्यान अफ दी म्याच’ भए ।
ला लिगा अन्तर्गत शनिबार राति रियल म्याड्रिड र रियल बेटिस, लिभान्ते र रियल सोसिडाड, एथलेटिक बिल्बाओ र सेल्टाभिगो तथा सेभिया र इल्चेबीच प्रतिस्पर्धा हुनेछ ।
