इङ्ग्लिस प्रिमियर लिग फुटबलमा म्यानचेस्टर सिटीले वेस्टह्याम युनाइटेडलाई हराएको छ।
सिटीले घरेलु मैदानमा वेस्टह्याम युनाइटेडमाथि २–१ गोल अन्तरको जित निकालेको हो। सिटीको जितमा इल्के गुन्डोगान र फेर्नान्डिन्होले एक/एक गोल गरे । वेस्ट ह्यामका म्यानुएल लान्जिनीले एक गोल गरे।
इतिहाद स्टेडियममा गए राति भएको खेलको ३३औं मिनेटमा गुन्डोगानले गोल गर्दै सिटीलाई सुरूआती अग्रता दिलाए।
पहिलो हाफमा १–० को अग्रता लिएको सिटीले खेलभर पाहुना टोलीलाई दवावमा राखेको थियो।
इन्ज्युरी समयको सुरूमै फर्नान्डिन्होले गोल गर्दै सिटीको अग्रता दोब्बर पारे। खेल सकिन केही बेरअघि म्यानुयल लान्जिनीले गोल गरे पनि वेस्टह्यामको हार टार्न सकेनन्।
जितसँगै सिटी १३ खेलबाट २९ अंक जोड्दै लिभरपुललाई पछि पारेर दोस्रो स्थानमा उक्लिएको छ। समान खेलबाट लिभरपुलको २८ अंक छ।
पराजित वेस्टह्याम २३ अंक जोडेर चौथो स्थानमा छ। आर्सनलको समान २३ अंक भए पनि गोल अन्तरमा पछि छ।
