इंग्लिस प्रिमियर लिग फुटबलमा टोटेनहमले नर्विच सिटीमाथि सहज जित निकालेको छ। आइतबार राति भएको खेलमा टोटेनहमले नर्विच सिटीलाई ३-० गोल अन्तरमा हराउँदै पाँचौ स्थानमा उक्लिएको छ।
घरेलु मैदानमा टोटनहमलाई जिताउन लुकास मौरा, डेभिनसन सान्चेज र सन ह्युङ मिनले गोल गरे।
खेलको दसौं मिनेटमा मौराको गोलबाट सुरूवाती अग्रता लिएको टोटनहमले पहिलो हाफमा १-० को अग्रता थियो।
दोस्रो हाफमा थप आक्रमक खेल खेलेको खरेलु टोलीले ६७ औं मिनेटमा अग्रता दोब्बर पार्यो। उसका लागि डेभिनसन सान्चेजले गोल गर्दै टोटेनहमलाई २-० को अग्रता दिलाए।
त्यसपछि खेलको ७७ औं मिनेटमा सन ह्युङ मिनले गोल गर्दै टोटेनहमलाई ३-० को स्पष्ट जित दिलाए।
यो जितसँगै टोटेनहमले १४ खेलमा २५ अंक जोड्दै अंक तालिकाको पाँचौ स्थानमा उक्लिएको छ। पराजित नर्विच १० अंक जोडेर पुछारमा छ।
तालिकाको शीर्ष स्थानमा ३५ अंकसहित म्यान्चेष्ट सिटी छ भने दोस्रो स्थानमा ३४ अंक जोडेको लिभरपुल र तेस्रो स्थानमा ३३ अंक जोडेको चेल्सी छन्।
