लेष्टर सिटीले इंग्लिस प्रिमियर लिग फुटबलमा न्युकासल युनाईटेडमाथि सहज जित निकालेको छ । आइतबार भएको खेलमा लेष्टरले न्युकासललाई ४-० गोल अन्तरले हराउँदै अंक तालिकाको आठौं स्थानमा उक्लिएको छ।
घरेलु मैदानमा लेष्टरलाई जिताउन युरी टिलमेन्सले दुई गोल गर्दा पाट्सन डाका र जेम्स म्याडिसनले एक-एक गोल गरे।
खेलको ३९ औं मिनेटमा युरीले पेनाल्टीमा गोल गर्दै घरेलु टोलीलाई सुरूआती अग्रता दिलाएका थिए ।
पहिलो हाफसम्म १-० ले अघि रहेको लेस्टरले दोस्रो हाफमा थप ३ गोल थप्यो।
उसका लागि ५७ औं मिनेटमा डाकाले गोल गर्दै टिमको अग्रता दोब्बर बनाए।
खेलको ८१ औं मिनेटमा युरीले व्यक्तिगत दोस्रो गोल गर्दै लेष्टरलाई ३-० को अग्रता दिलाए ।
त्यसपछि खेलको ८५ औं मिनेटमा म्याडिसनले गोल गर्दै लेष्टरलाई ४-० को स्पष्ट जित दिलाए ।
यो जितसँगै लेष्टर १६ खेलमा २२ अंक जोडेर तालिकाको आठौं स्थानमा उक्लिएको छ। रेलिगेशन जोनमा रहेको न्युकासलले १० अंक जोडेको छ।
