आर्सनल इंग्लिस कारबाओ कपको सेमिफाइनलमा पुगेको छ।
गएराती भएको क्वाटरफाइनलमा सन्डरल्याण्डलाई ५–१ गोल अन्तरमा हराउँदै आर्सनलले अन्तिम चारमा स्थान सुरक्षित गरेको हो।
आर्सनललाई जिताउन एडवार्ड नेक्टियाहले ह्याट्रिक गर्दा निकोलस पेपे र चार्ली पेटिनोले गोल गरे। सन्डरल्याण्डका लागि नाथन ब्रोडहेडले सान्त्वना गोल फर्काएका थिए।
खेलको १७ औं मिनेटमा नेक्टियाहले गोल गर्दै आर्सनललाई सुरूआती अग्रता दिलाएका थिए। त्यसपछि खेलको २७ औं मिनेटमा पेपेले गोल गर्दै अग्रता दोब्बर पारे। तर ३१ औं मिनेटमा सन्डरल्याण्डका लागि नाथनले गोल गर्दै खेललाई पहिलो हाफमा २-१ को स्थितिमा ल्याए।
दोस्रो हाफमा केही कमजोर देखिएको सन्डरल्याण्डमाथि आर्सनलले थप ३ गोल गर्यो। खेलको ४९ औं मिनेटमा नेक्टियाहले व्यक्तिगत दोस्रो गो गर्दा टिमको अग्रता ३-१ पुग्यो।
त्यसको १० मिनेट बित्न नपाउँदै ताभारेसको पासमा गोल गर्दै नेक्टियाहले आफ्नो ह्याट्रिक पुरा गरे।
त्यसपछि खेलको इन्जुरी समयमा पेटिनोले गोल गर्दै आर्सनललाई सानदार जित दिलाए।
