आर्सनल, लिभरपुल, चेल्सी र टोटनह्याम लिगकप फुटबलको सेमिफाइनलमा पुगेका छन्।
गएराति भएको खेलमा जित निकालेर लिभरपुल, चेल्सी र टोटनह्यामले अन्तिम चारको स्थान सुरक्षित गरेका हुन्। आर्सनल यसअघिनै समिफाइनलमा पुगिसकेको छ।
लिभरपुलले लेस्टर सिटीलाई ट्राइब्रेकरमा हराउँदै अन्तिम चारमा स्थान सुरक्षित गरेको हो। निर्धारित समयमा ३-३ गोलको बराबरीमा खेल सकिएपछि खेलको निर्णय ट्राइब्रेकरबाट लिइएको हो। जसमा लिभरपुलले ५–४ को कठिन जित निकाल्यो।
यस्तै गएराति नै भएको अर्को खेलमा चेल्सीले ब्रेन्टफोर्डलाई २–० ले हराउँदै सेमिफाइनलमा स्थान सुरक्षित गर्यो। चेल्सीका लागि जान्सन र जोर्गिन्होले गोल गरे। चेल्सीले खेलको अन्तिम १० मिनेटमा दुई गोल गरेको थियो।
त्यस्तै, वेष्टह्यामलाई २-१ ले पन्छाउँदै टोटनह्याम सेमिफाइनलमा पुगेको छ। उसका लागि बेर्गविजन र लुकास मोउराले गोल गरेका थिए। वेष्टह्यामका लागि बोवेनले गोल फर्काएका थिए।
योसँगै लिगकप फुटबलको सेमिफाइनल समिकरण पुरा भएको छ।
आगामी जनवरी ११ मा हुने पहिलो सेमिफाइनलमा लिभरपुल र आर्सनल तथा दोस्रोमा टोटनह्याम र चेल्सी भिड्नेछन्।
