इंग्लिस प्रिमियर लिग फुटबलमा टोटेनहमले सहज जित निकालेको छ। आइतबार राति भएको खेलमा टोटेनह्यामले क्रिस्टल प्यालेसलाई ३-० ले हराउँदै पाँचौ स्थानमा उक्लिएको छ।
घरेलु मैदानमा टोटनह्यामलाई जिताउन ह्यारी केन, लुकारस मौरा र सन ह्युङ मिनले गोल गरे।
खेलको ३२औं मिनेटमा गोल गर्दै केनले टोटेनह्यामलाई सुरुवाती अग्रता दिलाए। त्यसको २ मिनेटपछि लुकास मौराले गोल गर्दै अग्रता दोब्बर पारे।
खेलको ३७औं मिनेटमा विलफ्रेड जाहाले रातो कार्ड पाएपछि क्रिस्टल १० खेलाडीमा समेटिएको थियो।
पहिलो हाफमा २-० ले अघि रहेको टोटेन ह्यामले दोस्रो हाफमा थप एक गोल गर्यो। उसका लागि खेलको ७४औं मिनेटमा सन ह्युङ मिनले गोल गर्दै ३-० को जित दिलाए ।
जितसँगै टोटेनह्यामले १६ खेलमा २९ अंक जोडेर तालिकाको पाँचौँ स्थानमा उक्लिएको छ । क्रिस्टल २० अंकका साथ १२औं स्थानमा छ।
तालिकाको शीर्ष स्थानमा रहेको सिटीको १९ खेलबाट ४७ अंक छ। एक खेल कम खेलेको लिभरपुलको ४१ अंकसहित दोस्रो स्थानमा छ।
