इंग्लिस प्रिमियर लिग फुटबलमा आर्सनलले नर्विच सिटीलाई ५-० को फराकिलो गोल अन्तरले पराजित गरेको छ।
घरेलु मैदानमा आइतबार राति भएको खेलमा आर्सनललाई जिताउन बुकायो शाकाले २ तथा किरन टीएर्ने, एलेक्सजेण्डर लाकाजेटी र इमिल स्मिथले गोल गरे।
खेलको पहिलो छैठौं मिनेटमा नै शाकाले गोल गर्दै आर्सनललाई सुरूआती अग्रता दिलाए। यस्तै पहिलो हाफको अन्तिम मिनेटमा किरनले गोल गर्दै टोलीको अग्रता दोब्बर पारे।
पहिलो हाफमा २-० ले पछि परेको नर्विच खेलमा फर्कन सकेन। खेलको ६७ औं मिनेटमा शाकाले व्यक्तिगत दोस्रो गोल गर्दै टोलीलाई ३-० ले अघि बढाए। ८४ औं मिनेटमा लाकाजेटीले पेनाल्टीमार्फत गोल गर्दै अग्रता ४-० मा पुर्याए। त्यसपछि इन्जुरी समयमा इमिल स्मिथले गोल गर्दै टोलीको जित सु-निश्चित गरे।
यो जितसँगै आर्सनल १९ खेलबाट ३५ अंकसहित चौथो स्थानमा उक्लिएको छ। नर्विच १० अंक जोडेर पुछारमा रहेको छ।
तालिकाको शीर्ष स्थानमा रहेको म्यान्चेष्टर सिटीको ४७ अंक छ। यस्तै लिभरपुल र चेल्सी समान ४१ अंक जोड्दै दोस्रो र तेस्रो स्थानमा छन्।
