एफए कप फुटबलको तेस्रो चरणमा इङ्लिस क्लब चेल्सीले फराकिलो जित निकालेको छ । शनिबार भएको खेलमा चेल्सीले चेस्टरफिल्डलाई ५-१ गोल सानदार जित निकालेको हो।
घरेलु मैदानमा एकतर्फी जित निकाल्न चेल्सीका लागि टिमो वेर्नेर, कलुम हुडसन, रोमेलु लुकाकु, आन्द्रेअस क्रिस्टेनसन र हाकिम जीएचले गोल गरे।
खेलको छैठौं मिनेटमा वेर्नेरले गोल गर्दै चेल्सीलाई सुरूआती अग्रता दिलाए। खेलको १८ औं मिनेटमा कलुम हुडसनले गोल गर्दै टिमको अग्रता दोब्बर पारे।
त्यसको २ मिनेट पछि नै रोमेलु लुकाकुले गोल गर्दै खेललाई ३-० मा पुर्याए।
३९ औं मिनेटमा आन्द्रेअस क्रिस्टेनसनले गोल गर्दै चेल्सीको पहिलो हाफमा ४-० को अग्रता दिलाए।
खेलको ५५ औं मिनेटमा हाकिम जीएचले पेनाल्टीमा गोल गरेपछि चेल्सी ५-० ले अघि रह्यो ।
त्यसपछि खेलको ८० औं मिनेटमा चेस्टरफिल्डका अकव्सी एसन्टेले एक गोल गरे पनि त्यो पर्याप्त रहन सकेन। चेल्सी ५-१ ले विजयी हुँदै चौंथो चरणमा प्रवेश गरेको छ।
