म्यानचेस्टर युनाइटेड एफए कपको चौथो चरणमा प्रवेश गरेको छ। गएराति एस्टन भिल्लालाई १-० गोल अन्तरमा हराउँदै युनाइटेड चौथो चरणमा प्रवेश गरेको हो।
घरेलु मैदानमा युनाइटेडलाई जिताउन स्कट म्याकटोमिनेले निर्णायक गोल गरे। पहिलो हाफमा गरेको गोल नै खेल जित्न पर्याप्त रह्यो। उनले आठौं मिनेटमा गोल गरेका थिए ।
ओल्ड ट्राफोर्डमा सोमबार राति भएको प्रतिस्पर्धात्मक बनेको खेलको ५०औं मिनेटमा ड्यानी इंग्सले बराबरी गोल फर्काए पनि भिएआरमा उनको गोलले मान्यता पाएन। त्यसपछि पनि दुवै टोलीबाट केही खतरनाक आक्रमण सिर्जना भए पनि युनाइटेडले पहिलो हाफमा लिएको अग्रता जोगाउदै जित निकाल्न सफल भयो ।
यो जितसँगै एफए कपको अन्तिम ३२ को समिकरण पूरा भएको छ । अब युनाइटेडले मिडल्सब्रगसँग खेल्नेछ। यस चरणका खेल ६ फेब्रुअरीमा हुनेछन्।
