इंग्लिस प्रिमियर लिग फुटबलमा चेल्सीले टोटेनह्याममाथि सहज जित निकालेको छ।
आइतबार राति घरेलु मैदानमा टोटेनहमलाई २-० ले हराउँदै चेल्सीले सहज जित निकालेको हो। चेल्सीलाई जिताउन हाकिम जिएच र थियागो सिल्भाले एक-एक गोल गरे।
पहिलो हाफसम्म गोलरहित भएको खेलको दोस्रो हाफमा दुबै गोल सम्भव भएको थियो। खेलको ४७ औं मिनेटमा जिएचले गोल गर्दै चेल्सीलाई सुरूआती अग्रता दिलाएका थिए। त्यसपछि खेलको ५५ औं मिनेटमा सिल्भाले गोल गर्दै चेल्सीको अग्रता दोब्बर पारे।
खेलमा ६५ प्रतिशत बल पोजिशन राखेको चेल्सीले थप गोल गर्न सकेन। उता टोटनह्यामले पनि पाएका केही राम्रा मौका सदुपयोग गर्न नसक्दा हार व्यहोर्न बाध्य भयो।
यस जितसँगै चेल्सीले २४ खेलमा ४७ अंक जोड्दै तेस्रो स्थानमा यथावत छ।
चौथो स्थानमा उक्लने मौका गुमाएको टोटेनहम ३६ अंक जोडेर सातौं स्थानमा छ।
