युभेन्ट्स कोपा इटालिया फुटबलको सेमिफाइनलमा प्रवेश गरेको छ। बिहीबार राति भएको खेलमा सासोउलोलाई २-१ गोल अन्तरले हराउँदै युभेन्ट्स अन्तिम चारमा पुगेको हो।
एलिएन्ज एरिना टुरिनमा युभेन्ट्सको जितमा पाउलो डिबालाले गोल गर्दा एक गोल उपहार पाएको थियो। सस्सुलोका हामिद ट्राओरेले एक गोल फर्काए ।
घरेलु मैदानमा तेस्रो मिनेटमा पाउलो डिबलाले गोल गर्दै युभेन्ट्सलाई सुरुआती अग्रता दिलाएका थिए । तर, २४ औं मिनेटमा हामिद ट्राओरेले गोल गर्दै सासोउलोलाई १-१ गोलको बराबरीमा ल्याए।
पहिलो हाफ १-१ गोलको बराबरीमा रहेको खेलमा दोस्रो हाफमा पुन युभेन्टसले अग्रता लियो।
खेलको ८८ औं मिनेटमा सासोउलोका राउन ट्रेसोल्डिले आत्मघाती गोल उपहार दिएपछि युभेन्ट्स २-१ ले विजयी हुँदै सेमिफाइनलमा प्रवेश गर्यो।
यस्तै गए रातीनै भएको अर्को खेलमा १० खेलाडीमा समेटिएको फियोरेन्टिनाले एटलान्टालाई ३–२ गोल अन्तरमा हराउँदै सेमिफाइनलमा स्थान बनाएको छ।
फियोरेन्टिनाको जितमा क्रिजिस्टफ पियाटिकले दुई तथा निकोला मिलिन्कोभिकले एक गोल गरे । एटलान्टाका डाभिड जापाकोस्टा र जेरिमी बोगाले एक गोल गरे ।
अब युभेन्ट्सले फाइनल प्रवेशका लागि फियोरेन्टिनासँग प्रतिस्पर्धा गर्नेछ।
