फ्रेण्ड्स क्लबले सहिद स्मारक ए डिभिजन लिगमा सिजनमा पहिलो जित हात पारेको छ।
फ्रेण्ड्सले शुक्रबार दशरथ रंगशालामा भएको खेलमा ब्रिगेड ब्वाइज क्लबमाथि ५-२ को जित निकालेको हो।
यसअघिका ९ खेलमा जितविहीन फ्रेण्ड्स १०औं खेलमा जित निकाल्न सफल भएको हो।
जितसँगै फ्रेण्ड्स अंक तालिकाको पुछारको स्थान छाड्न सफल भएको छ। दुई स्थान माथि १२औं स्थानमा उक्लिएको फ्रेण्ड्सको १० खेलबाट ६ अंक जोडेको छ।
६ अंक नै जोडेको ब्रिगेड १३औं स्थानमा झर्दा ५ अंक जोडेको च्यासल पुछारमा पुगेको छ। फ्रेण्ड्सलाई सिजनको पहिलो जित दिलाउने क्रममा सुशील साह र जमोउल एन्थोनीले दुई दुई गोल गरे।
खेलको १४ मिनेटमा सुशीलको गोलबाट फ्रेण्ड्सले अग्रता लियो। २५ मिनेटमा ब्रिगेडका ड्यारी वाम्बाले बराबरी गोल फर्काए।
२७ मिनेटमा फ्रेण्ड्सका श्यामबाबु कक्षपतिले गोल गर्दा खेल २-१ को अवस्थामा आयो।
पहिलो हाफको इन्जुरी मिनेटमा जमोउल एन्थोनीले फ्रेण्ड्सका लागि तेस्रो गोल गरे। उनै एन्थोनीले ७७ मिनेटमा अर्को गोल गर्दा फ्रेण्ड्स ४-१ ले अघि बढ्यो। लगत्तै सुशीलले टिमका लागि पाँचौ र व्यक्तिगत दोस्रो गोल गरे।
ब्रिगेडका लागि ८६ मिनेटमा अनिल गुरुङले पेनाल्टीमा दोस्रो गोल गरेका थिए।
