सहिद स्मारक ए डिभिजन लिगमा साविक विजेता मछिन्द्र फुटबल क्लब उपाधि रक्षातर्फ अघि बढेको छ।
मछिन्द्रले शनिबार भएको खेलमा अंक तालिकाको पुछारमा रहेको च्यासल युथ क्लबलाई २-० गोलले पराजित गर्यो।
दशरथ रंगशालमा भएको खेलमा मछिन्द्रको जितमा विमल घर्तिमगर र सुनील बलले गोल गरे।
खेलको १७ मिनेटमा विमलले गोल गर्दै मछिन्द्रलाई अग्रता दिलाए। ३५ मिनेटमा सुनील बलले मछिन्द्रको अग्रता दोब्बर पारे।
यता एन्फा कम्प्लेक्समा भएको खेलमा सातदोबाटो युथ क्लबले नेपाल पुलिस क्लबलाई पराजित गरेको छ।
नवप्रवेशी सातदोबाटोले पूर्व च्याम्पियन पुलिसलाई १-० गोलले पराजित गर्यो।
सातदोबाटोका लागि आकास बुढामगरले गरेको गोल निर्णायक बन्यो। उनले खेलको १९ मिनेटमा पेनाल्टीमा गोल गरेका थिए।
लिगको अंक तालिकाको शीर्ष स्थानमा रहेको साविक विजेता मछिन्द्रको १० खेलबाट २६ अंक भएको छ। दोस्रो स्थानको त्रिभुवन आर्मी क्लबको २० अंक छ।
यता सातदोबाटो १५ अंक जोड्दै पाँचौ स्थानमा उक्लिएको छ भने १०औं स्थानको पुलिसको १० अंक छ। पुछारको च्यासलले ५ अंक मात्र जोड्न सफल भएको छ।
