सहिद स्मारक ए डिभिजन लिगमा मनाङ मर्स्याङ्दी क्लबले अर्को हार बेहोरेको छ।
आइतबार दशरथ रंगशालामा भएको खेलमा मनाङमाथि न्युरोड टिम (एनआरटी) ले १-० गोलको जित हात पारेको हो।
अघिल्लो खेलमा मनाङलाई सशस्त्र प्रहरी बलको एपिएफ क्लबले पराजित गरेको थियो। एनआरटीको जितमा मेसौके ओलोमोउले गरेको गोल निर्णायक बन्यो। उनले खेलको २६ मिनेटमा गोल गरेका थिए।
जितसँगै एनआरटी अंक तालिकाको दोस्रो स्थानमा उक्लिएको छ। एनआरटीले १२ खेलबाट २० अंक जोडेको छ।
२० अंक नै जोडेको मनाङ तेस्रो स्थानमा झरेको छ। चौथो स्थानको त्रिभुवन आर्मी क्लबको १९ अंक छ।
शीर्ष स्थानको मछिन्द्र क्लबले यसअघि नै उपाधि जितिसकेको छ। मछिन्द्रले अन्तिम खेलअघि ३२ अंक जोडेको छ।
