नेपाल आइस पाँचौं झापा गोल्ड कप २०७८ को खेलमा नेपाल र भारतका १० टोली सहभागी हुने भएका छन्।
गत वर्ष कोभिडका कारण रोकिएको गोल्डकप यस वर्ष यही फागुन २१ देखि ३० गतेसम्म बिहीबार सञ्चालन विर्तामोडमा पत्रकार सम्मेलन गरी आयोजक झापा गोल्डकपले जनाएको छ।
मोफसलको लोकप्रिय प्रतियोगिताको सम्पूर्ण तयारी पनि पूरा भएको आयोजकले जनाएको छ।
विर्तामोडस्थित डोमालाल रंगशालामा हुने खेल १० हजार दर्शकले हेर्न सक्ने गरी बाँसको प्यारापिट निर्माण गरिएको छ। खेलमैदानको घाँस काटेर र सरसफाइ गरेर चिटिक्क बनाइएको छ।
आयोजकका अनुसार पाँचथर, इलाम, मोरङ, सुनसरी लगायतका जिल्लाबाट दर्शकको सहभागिता हुने विश्वास छ।
उद्घाटन खेल सातदोबाटो युथ क्लब र जावलाखेल युथ क्लबबीच हुने गोल्डकपका सचिवालय सदस्य हिमाल खरेलले जानकारी दिए।
उनका अनुसार त्यसपछिको दोस्रो खेल फागुन २२ गते नेपाल पुलिस क्लब र काठमाडौंकै संकटा क्लबबीच हुनेछ।
तेस्रो खेल पहिलो खेलको विजेतासँग एपिएफ फुटबल क्लबले प्रतिस्पर्धा गर्नेछ। चौथो खेल दोस्रो दिनको विजेतासँग थ्री स्टार क्लबले खेल्नेछ।
उनका अनुसार पाँचौं खेल त्रिभुवन आर्मी फुटबलसँग भारत दार्जिलिङको एमएफसीले सामना गर्नेछ।
गोल्ड कपमा छैटौं खेल झापा ११ फुटबल क्लबले भारत सिक्किमको आरपी एफसीसँग प्रतिस्पर्धा गर्नेछ।
प्रतियोगिताको पहिलो सेमिफाइनल खेल फागुन २७ गते र दोस्रो सेमिफाइनल खेल फागुन २८ गते हुनेछ भने फाइनल खेल फागुन ३० गते सोमबार हुने जनाइएको छ।
पाँचौं संस्करणको गोल्डकपको विजेताले १२ लाख ५५ हजार रुपैयाँ र उपविजेताले ६ लाख पाँच हजार रुपैयाँ प्राप्त गर्नेछन्। गोल्डकप सम्पन्न गर्न एक करोड ४० लाख रुपैयाँ खर्च लाग्ने अनुमान गरिएको आयोजकले जनाएको छ।
प्रतियोगिताको मोस्ट भ्यालुएबल प्लेयरलाई एक थान मोटरसाइकल, उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर र उत्कृष्ट प्रशिक्षकलाई जनही रु २१ हजार र उच्च गोलकर्तालाई रु २५ हजारसहितको पुरस्कार प्रदान गरिनेछ।
प्रत्येक खेलको ‘म्यान अफ द म्याच’लाई रु नौ हजार ९९९ दिइने तयारी छ। खेलको उद्घाटन पूर्वप्रधानमन्त्री केपी शर्मा ओलीले गर्ने आयोजक संस्थाले जनाएको छ।
