इंग्लिस प्रिमिय लिग फुटबलमा टोटनह्याम हटस्परले सानदार जित निकालेको छ।
आइतबार राति भएको खेलमा टोटेनहमले लेस्टरलाई घरेलु मैदानमा ३-१ ले हरायो। टोटेनहमको जितमा ह्युङ मिन सनले २ तथा ह्यारी केनले एक गोल गरे। लेस्टरका केलेची इहेनाचोले सान्त्वना गोल फर्काएका थिए।
खेलको २२ औं मिनेटमा केनले गोल गर्दै टोटनह्यामलाई सुरूआती अग्रता दिलाएका थिए।
पहिलो हाफमा १-० ले अघि रहेको टोटनह्यामले दोस्रो हाफमा थप २ गोल गर्यो। खेलको ६० औं मिनेटमा सनले गोल गर्दै अग्रता दोब्बर पारे।
७९ औं मिनेटमा सनले व्यक्तिगत दोस्रो तथा टिमका लागि तेस्रो गोल गरेका थिए। दोस्रो हाफको इन्जुरी समयमा केलिचीले लेस्टरका लागि १ गोल फर्काएका थिए।
यो जितसँगै टोटेनहमले ३४ खेलमा ६१ अंक जोड्दै शीर्ष चारमा रहने सम्भावना कायमै राखेको छ। तालिकाको चौथो स्थानमा समान खेलबाट ६३ अंक जोडेको आर्सनल उक्लिएको छ। तेस्रो स्थानमा रहेको चेल्सीले ६६ अंक जोडेको छ।
