झापाको शिवसताक्षीमा जिल्लाका स्थानीय तहस्तरीय भलिबल प्रतियोगिता हुने भएको छ।
शिवसताक्षी भलिबल क्लब र सतासीधाम जेसीजको संयुक्त आयोजनामा दोश्रो संस्करणको भलिबल प्रतियोगिता हुन लागेको शुक्रबार दुधेमा पत्रकार सम्मेलन गरी आयोजकले जानकारी दिएको छ।
शिवसताक्षी नगरको दुधेस्थित खेल मैदानमा बैशाख ३ गतेदेखि ७ गतेसम्म सो प्रतियोगिता हुने खेल संयोजक राजु श्रेष्ठले बताए।
प्रतियोगितामा झापाका पन्ध्र वटै स्थानीय तहको सहभागिता रहने छ। बिजेताले ७५ हजार, उपबिजेताले ४५ हजार, तृतीय हुनेले २० हजार र सान्त्वनाले १० हजारसहित मेडल, ट्रफी र प्रमाण पत्र पाउने आर्थिक समितिका सदस्य विनोद खरेलले जानकारी दिए।
अघिल्लो वर्ष विजेताले ५१ हजार पुरस्कार पाएको थियो। झापामा भलिवल खेलाडी उत्पादन र उनीहरुलाई प्रत्साहन गर्ने उद्देश्यले शिवसताक्षी नगरमा गत वर्षदेखि भलिबल प्रतियोगिता हुँदै आएको छ।
