नेपाल भलिबल संघको आयोजनामा पाँचौ एनभिए राष्ट्रिय क्लब महिला तथा पुरुष भलिबल च्याम्पियनसिप २०२० शुक्रबारबाट सुरु भएको छ।
दशरथ रङ्गशाला कभर्डहलमा सुरु भएको च्याम्पियनसिपको पहिलो खेलको पुरुषतर्फ त्रिभुवन आर्मी क्लब र सशस्त्र प्रहरीको एपिएफ क्लबले विजयी भएका छन्।
ग्रुप एको पहिलो खेलमा टिएसीले आरजी भलिबल ग्रुपलाई ३–० को सेटमा पराजित गर्यो। पहिलो सेटमा २५–९ ले जित निकालेको टिएसीले दोश्रोमा २५–१६ र तेश्रो सेटमा २५–९ ले पराजित गर्दै अंक जोड्न सफल भयो।
यस्तै ग्रुप बीको दोश्रो खेलमा एपिएफले बुलबुले रारा क्लबलाई ३–१ सेटमा पराजित गर्न सफल भयो। तीन अंक जोड्ने क्रममा एपिएफ पहिलो सेटमा बिआरसी संग २३–२५ले पछि पर्यो। तर दोश्रो सेटमा २५–१३, तेश्रोमा २५–२० र चौथोमा २५–१८ को जित निल्दै अगाडी बढ्यो।
महिलातर्फ ग्रुुप एको पहिलो खेलमा न्यूडायमन्डले कठिन जित निकाल्यो।
पुलिससँग पहिलो सेटमा १७–२५ ले पछाडि परेको डायमन्ड दोश्रो सेटमा २५–१८ को जित निकाल्न सफल भयो।
तर फेरी चौथो सेटमा २३–२५ को झिनो अन्तरले पछाडि परेको डायमन्डले चौथो सेटमा २५–१८ र अन्तिम तथा डिसाईडिङ्ग सेटमा १५–११ ले पुलिसलाई पछि पार्दै ३ अंक बटुल्न सफल भयो।
