छैटौं एनभिए राष्ट्रिय महिला तथा पुरुष भलिबल क्लब लिग २०७९ मा बिहीबार पनि महिलातर्फ पुलिसले जित निकाल्दै अपराजित यात्रालाई कायमै राखेको छ।
पुलिसले प्रतिभा माली बेगर खेलेको न्यूडायमण्डलाई २५–११, २५–१७, २५–१५ ले पराजित गरेको हो।
पुलिसले आफूले खेलेको तीन खेलमा तीनै खेलमा जित हात पारेको छ। यससँगै पुलिसको लिगमा ९ अंक भएको छ।
यस्तै बिहीबारनै भएको महिलातर्फको अर्को खेलमा एपिएफले एभरेष्ट भलिबल क्लबलाई २५–१३, २५–१०, १९–२५, २५–१९ ले पराजित गर्यो। एपिएफको तीन खेलबाट ६ अंक भएको छ ।
लिगमा पुरुषतर्फ गलकोट स्पोर्टस् क्लब र हेल्प नेपालले जित निकाले। गलकोटले ढोरपाटन स्पोर्टस् क्लबलाई ३–२ सेटमा पराजित गरेता पनि अंक बाड्न बाध्य भयो।
गलकोटले ढोरपाटनलाई २३–२५, २५–१५, १८–२५, २५–२२, १५–८ ले पराजित गरेको हो। गलकोटको यो जितसँगै २ अंक भएको छ भने ढोरपाटनको १ अंक भएको छ ।
आजै सम्पन्न अर्को खेलमा टिपटप हेल्प नेपाल स्पोर्टस् क्लबले पुलिस क्लबमाथि ३–० को जित निकाल्यो।
हेल्प नेपालले २५–२३, २५–२३ र २५–२० को जित निकाल्दै आफ्नो खातामा थप ३ अंक जोड्यो।
यससँगै हेल्प नेपालको ११ अंक भएको छ। नेपाली सेनाको १२ अंक भएको छ। हिजो ढिला गरि भएको प्रतिस्पर्धामा सेनाले ढोरपाटन स्पोर्टस् क्लबलाई पराजित गर्दै थप ३ अंक जोडेको थियो।
