-सुनिल मणि दाहाल
अमेरिका नेपाल सोसाइटी (एएनएस) ले मे २७ तारिखमा भर्जिनियाको सेन्टरभिल हाईस्कूलमा हेरिटेज नेपाल फेस्टिवल भव्य रूपमा सम्पन्न गरेको छ।
दोस्रो पुस्ताका नेपालीभाषी युवाहरुको व्यापक सहभागिता रहेको कार्यक्रममा विशेष सांस्कृतिक कार्यक्रम पनि प्रदर्शन गरिएको थियो।
उक्त कार्यक्रममा डिसी मेट्रो क्षेत्र अन्तर्गत भर्जिनिया, वासिंगटन डिसी र मेरिल्यान्ड लगायत अन्य राज्यहरूवाट सहभागी नेपालीहरूको उल्लेखनीय उपस्थिति थियो।
कार्यक्रममा कांग्रेसम्यान बारवरा कमस्टिक, टिम होगो, अमेरिकाका लागि नेपालका राजदूत अर्जुन कार्की र एएनएसका अध्यक्ष प्रभा देउजाले कार्यक्रमको सफलताको शुभकामना दिएका थिए।
स्थानीय संघ संस्थाका पदाधिकारीहरूको वाक्लो उपस्थिति रहेको उक्त विशाल कार्यक्रममा समाजका पाँच व्यक्तित्वलाई सम्मान गरिएको थियो।
प्रायः नेपालीभाषीले आयोजना गर्ने कार्यक्रममा दोस्रो पुस्ताका युवाको सहभागिता कम देखिएकोले उनीहरुको व्यापक सहभागितामा हेरिटेज नेपाल उत्सव मनाई स्थानीय प्रतिभाशाली युवाहरुलाई प्रोत्साहन गर्न गत तीन वर्षदेखि एएनएय लागिपरेको एएनएसका सचिव सुदिप पोखरेलले जानकारी गराए।
प्रवासमा नेपाली भाषा, कला, संस्कार र संस्क्रितिको प्रचार प्रसार गरी नेपाली मौलिकतालाई विदेशी सामु चिनाउने र दोश्रो युवा पुस्तालाई सहभागी गराई उनीहरूको प्रतिभालाई प्रोत्साहन गर्दै जाने मुख्य उदेश्यसहित नेपाल हेरिटेज उत्सव सन् २०१६ देखि एएनएसले प्रत्येक वर्षको मे महिनामा आयोजना गर्दै आएको छ।
साँस्कृतिक कार्यक्रमा मिडियाहरूलाई लाईभ प्रसारण गर्न निशेध गरिएकोमा एएनएसको उक्त निर्णय नेपाल हेरिटेज महोत्सवको भावना र उदेश्य विपरित भएको भन्दै अमेरिकाका नेपाली मिडियाहरूले असन्तुष्टि जनाएका थिए।
यस किसिमको कार्यक्रमको व्यापक प्रचार र प्रसार गरिनु पर्नेमा सहभागिता कम हुने आशंकाले एएनएयले यस किसिमको गलत निर्णय लिन नहुने मिडियाकर्मीहरूले प्रतिक्रिया दिएका थिए।
आयोजक मध्येका एक पदाधिकारीले भने- ‘एएनएसमा के निर्णय हुन्छ र के गरिन्छ खासै आपसमा सर सल्लाह नहुने र ‘वान म्यान सो’ हुने गरेकोले गल्ती हुने गरेकोले यस तर्फ छिट्टै छलफल चलाईने र गल्ती र कमजोरी सच्याईनेछ।’
अमेरिकाले हरेक वर्ष मे महिनालाई एशियन प्यासिफिक अमेरिकन हेरिटेज महिनाकोरुपमा मनाउने गर्छ। यसै अवसर पारेर अमेरिकाकै पुरानो मध्येको एक नेपाली संस्था एएनएसले यस्तो कार्यक्रमलाई विगत तिन वर्ष देखि निरन्तरता दिदै आएको छ ।