अमेरिकामा बसोबास गरिरहेका नेपालीहरुको संस्था एनआएरन एनसिसी, युएसए र टेनपसी राज्यको न्यासभिलमा बसोबास गरिरहेका नेपालीहरुको संस्था ‘न्यासभिल नेप्लिज एसोसिएसन’को अग्रसरतामा तनहुँस्थित भुइँचालाले जिर्ण एक स्कुलको पुनर्निर्माण सम्पन्न भएको छ।
भानु नगरपालिका २ स्थित श्री विश्वज्योति प्राथमिक विद्यालयको पुनर्निर्माणका लागि एनआरएन एनसिसी, युएसएका अध्यक्ष केशव पौडेलले सहयोग जुटाउन मुख्य भूमिका खेलेका थिए। त्यसैगरी ‘न्यासभिल नेप्लिज एसोसिएसन’का तर्फबाट अध्यक्ष घनश्याम भट्टले समेत सहयोगका लागि भूमिका खेलेका थिए। सोमित वर्ल्ड फाउन्डेसनले समेत आर्थिक सहयोग गरेको थियो।
स्थानीयको श्रमदान तथा आर्थिक सहयोगसमेत रहेको थियो।
पुनर्निर्माणका लागि करिब २८ लाख रुपैयाँ खर्च गरिएको स्कुलले चारकोठे पक्की भवन पाएको छ। विद्यालयका प्रधानाध्यापक नारायणबहादुर बसेलका अनुसार ६ लाख रुपैयाँ स्थानीयबाट उठेको थियो भने २२ लाख बाह्य सहयोगले चारकोठे पक्की भवन ठड्याउन सफल भएको हो।
प्रदेश–४ का सभासद डोबाटे विश्वकर्माले भवनको उद्घाटन गरेका थिए।
विद्यालय भवन निर्माणका लागि वडा सामुदायिक वन, भानु न.पा. कार्यालय, वडा कार्यालय, मनकामना सशस्त्र प्रहरी गण, इलाका प्रहरी कार्यालय, भानु र अभिभावक समितिको उलेख्य सहयोग रहेको बसेलले जानकारी दिए।