लोकप्रिय गायक रामकृष्ण ढकालले अमेरिकाको न्यूयोर्कमा पहिलो पटक एकल गायन कार्यक्रम प्रस्तुत गरेका छन्।
स्वदेशमा धेरै पटक आयोजना भइसकेको उनको ‘ढकाल सुमधर साँझ’ कार्यक्रम विदेशमा पहिलो पटक आयोजना भएको हो ।
कार्यक्रमको समापनपछि गायक ढकालले अमेरिकाको ढकाल सुमधुर साँझ ऐतिहासिक रहेको प्रतिक्रिया दिए। कार्यक्रममा ढकालले आफ्ना लोकप्रिय गीतहरु प्रस्ततु गरेका थिए।
कार्यक्रम अवधिभर गायक ढकालाई उपस्थित दर्शकहरुले समेत राम्रो साथ दिएका थिए। गीत सुन्न क्रममा दर्शकहरु भावुक समेत बनेको देखिएको थियो ।
एकल गायनको थालनी गायक ढकालले राष्ट्रिय गीत ‘बिहान उठ्ने बित्तिकै...’ बाट गरेका थिए।
नेपाली राष्ट्रिय पहिरनमा सजिएका गायक ढकालले उक्त गीत गाइरहँदा दर्शक दिर्घामा भावुकता छाएको थियो। त्यसपछि गीतको मुडअनुसार दर्शकको भाव बदलिँदै गयो।
कार्यक्रममा प्रेक्षालयमा क्षमताभन्दा बढी संख्यामा दर्शकहरु आएका थिए। अहिलेसम्म देश बाहिर प्रस्तुत गरेका कार्यक्रममा यो स्मरणीय रहेको गायक ढकालको प्रतिक्रिया छ।
आफ्नो एकल गायन कार्यक्रममा गायक ढकालले अमेरिकामै बसोबास गरिरहेका लोकप्रिय नेपाली वाद्यवादकहरुको साथ पाएका थिए।
कार्यक्रममा गायक ढकाललाई ६ जना वाद्य वादकहरुले साथ दिएका थिए। बाँसुरीमा सुशील विश्वकर्मा, तवलामा प्रमोद उपाध्याय, गिटारमा बिष्णु सुनवार, बेस गिटारमा शिशिर श्रेष्ठ, किवोर्डमा डेभिड ढकाल तथा अक्टोप्याड मादलमा न्हुच्छेमान डंगोलले साथ दिएका थिए।
मितेरी ग्रुप समूहको हिमालयन इभेन्ट्सद्वारा आयोजित कार्यक्रमको संयोजन अभय ढुंगेलले गरेका हुन्। कार्यक्रममा अमेरिकास्थित नेपाली राजदूतावासका वाणिज्य दूत कृषु क्षेत्रीको पनि उपस्थिति थियो।
करिब तीन तीन घन्टासम्म सञ्चालन भएको उक्त कार्यक्रममा गायक ढकाललाई स्थानीय कलाकारहरु बसन्ती राई र दिपा ढुंगेलले यूगल गायनमा साथ दिए।