गैर आवासीय नेपाली सङ्घ, राष्ट्रिय समन्वय समिति (एनआरएन) अमेरिकाले आफ्ना कार्यसमितिका दुई जना पदाधिकारीहरूलाई नागरिकता ऐन २०६३ लाई संशोधन गर्न बनेको विधेयकमा गैर आवासीय नेपालीहरूका तर्फ बाट 'लबिङ्ग' गर्न नेपाल पठाएको छ।
नागरिकता ऐन २०६३ लाई संशोधन गर्न बनेको विधेयकमा मागहरू बारे स्पष्ट नभएको निष्कर्ष सहित सम्बन्धित विषयहरूमा नेपाल सरकारको ध्यानाकर्षण गराउन एनआरएन अमेरिकाको दुई सदस्यीय टोली आज काठमाडौँका लागी उडेको हो ।
एनआरएन अमेरिकाले एक विज्ञप्ति प्रकाशित गर्दै हाल राज्य व्यवस्था तथा सुशासन समितिमा विचाराधीन रहेको नागरिकता विधेयकमा थुप्रै सच्याउनुपर्ने देखिएपछि सरकारलाई यसबारे ध्यानाकर्षण गराउन एनआरएन अमेरिकाले उपाध्यक्ष जेदु पोखरेल र बोर्ड अफ डाइरेक्टर सञ्जय थापालाई काठमाडौँ पठाइएको जानकारी दिएको हो ।
यस अघि एनआरएन अमेरिकाका अध्यक्ष डा. केशव पौडेलले पूर्व सभामुख सुवास नेम्वाङ लगायतका व्यक्तिहरू सँग यसबारे छलफल गरेका थिए भने एनआरएन अमेरिकाले महावाणिज्यदुतावास मार्फत सरकारलाई ज्ञापन पत्र बुझाएको थियो ।
