अमेरिकाका ४१ औँ राष्ट्रपति जर्ज एच डब्लु बुसको शुक्रवार राती मृत्यु भएको छ।
बुस परिवारका प्रवक्ता जिम मेक्ग्राथका अनुसार शुक्रवार बेलुका १० बजे ९४ वर्षको उमेरमा पूर्व राष्ट्रपतिले प्राण त्यागेका हुन्। ८ महिना अघि राष्ट्रपति बुसकी श्रीमती बारबरा बुसको मृत्यु भएको थियो।
अमेरिकाका ४३ औँ राष्ट्रपति जर्ज डब्लु बुसका पिता समेत रहेका स्वर्गीय राष्ट्रपति बुस विगत लामो समय देखि 'भास्कुलर पार्किन्सन' रोगबाट ग्रसित थिए। राष्ट्रपति बुसको जन्म जुन १२,१९२४ मा मिल्टन, म्यशाच्य्सट्स राज्यमा भएको थियो।
सन् १९६५ देखि राष्ट्रपति बुस टेक्सस राज्यमा बस्दै आएका थिए। राष्ट्रपति बुसले सन् १९८९ देखि १९९३ सम्म राष्ट्रपति पदको कार्यभार सम्हालेका थिए। राष्ट्रपति पदका दोस्रो अवधिको प्रयास सफल नभए पनि राष्ट्रपति बुसलाई अमेरिकन इतिहास मै सबै भन्दा कुशल र अनुभवी राजनीतिज्ञ मानिन्छ।
राष्ट्रपति बुसले आफ्नो जीवनकालमा उच्च तहको नेभी पाइलट,सफल तेल व्यवसायी,अमेरिकी कंग्रेश, संयुक्त रास्ट्रसंघ प्रतिनिधि, रिपब्लिकन पार्टीको सभापति, सिआइएको निर्देशक लगायतका पदहरू सम्हालेका थिए।
