नेपालको कला, संस्कृति, रीतिरिवाज, प्राकृतिक सुन्दरता बारम्बर अन्तर्राष्ट्रिय लेखका विषय बनिरहेका हुन्छन्।
विश्वले काठमाडौंको स्वयम्भूनाथ र बौद्ध स्तुप ‘मंकी टेम्पल (बाँदरहरुको मन्दिर)’ का रुपमा चिन्दै आएको छ।
अहिले विभिन्न सामाजिक सञ्जाल र अन्तर्राष्ट्रिय समाचारमाध्यममा स्वयम्भूनाथ चर्चामा छ, एक बाँदरका कारण।
कम समयमा नै इन्टरनेटमा छाउन सफल यो बाँदरले उपाधि पाएको छः विश्वकै फोटोजेनिक बाँदर।
बज फिड डटकममा उल्लेख भएअनुसार सन् २०१५ मा अध्ययन क्रममा नेपाल भएकाबेला टेलर एलेक्सी नामकी युवतीले स्वयम्भूमा यो बाँदरको फोटो खिचेकी थिइन्। उनले फोटो इन्स्टाग्राममा पोस्ट गरिन्।
फोटोमा बाँदरले दिएका पोजले सबैको ध्यानाकर्षण गर्यो।
बजफिडले एलेक्सीसँग कुरा गर्दा उनले यो फोटो काठमाडौंको स्वयम्भूनाथमा खिचेको बताइन्। ‘स्वयम्भूनाथका हरेक बाँदरको स्वाभाव र हाउभाउ फरक छ,’ उनले भनिन्, ‘कुनै बाँदर मान्छे निकट भएको मनपराउँछन्, कुनै तर्किन्छन्। मैले फोटो खिचेको यो भन्ने पूरै चटके थियो।’
आफूले फोटो खिच्न लाग्दा बाँदरले मोडलिङमा झैं पोज दिएको एलेक्सी सम्झन्छिन्।
उनले भनिन्, ‘म उसको निकै नजिक थिएँ र उसलाई थाहा थियो म उसको फोटो खिच्दै छु भन्ने। उसले मेरो निकटता सहज मान्यो र फोटोका लागि पोज दिन थाल्यो।’
एलेक्सीले पोस्ट गरेका फोटामा बाँदरले जीउ तन्काउँदै, बटार्दै पोज दिएको छ। इन्टरनेटमा अहिले यो ‘विश्वकै फोटोजेनिक बाँदर नेपालको स्वयम्भुनाथमा भेटियो’ भन्दै भाइरल भइरहेको छ।
तस्बिरः बजफिड
