पाल्पाको रामपुर नगरपालिका–७ माथिल्लो बस्तीमा वडा कार्यालयको सहयोगमा बेसार खेती सुरु गरिएको छ।
वडामा कृषकलाई बाँदर आतङ्कले सताएपछि अन्नबालीको विकल्पमा बेसार खेती सुरु गरिएको हो।
वडा कार्यालयले बेसार खेतीलाई प्रवद्र्धन गर्दै बीउबिजनमा सहयोग गरेको छ।
मकै उत्पादन हुने दश रोपनी बारीमा बाँदरको समस्याले खेती लगाउन छाडेकी शान्ति विकले अहिले साढे दुई रोपनी क्षेत्रफलमा बेसार लगाएकी छिन्। बाँझिएका सबै जमीनमा बेसार लगाएर ढाक्ने उनको योजना छ।
'बाँदरले खाला भन्ने पिरलो भएन, खेती लगाउन वडा कार्यालयले सहयोग गरेको छ। बजारमा सहजैसँग बिक्री भइहाल्छ', उनले भनिन्, 'बेसार लगाएपछि जग्गा सदुपयोगमा आयो भने अर्कोतर्फ आम्दानी पनि हुनेभयो।'
वडाले आव ०७५/०७६ को रु तीन लाख बजेटबाट ३५ क्विण्टल बेसारको बीउ कृषकलाई उपलब्ध गराएको वडाध्यक्ष तीर्थप्रसाद पङ्गेनीले बताए।
'बारीबाटै मकै, गहुँलगायतका अन्नबाली बाँदरले खाएर नष्ट पारेको गुनासो आएपछि विकल्पका रुपमा कार्यालयले जग्गा बाँझो नराख्न भनेका छौँ', उनले भने, 'कृषकले आम्दानी लिन सकिने गरी बेसार खेतीका लागि सहयोग गरेका छौँ”।'
बजारको व्यवस्थापन पनि वडा कार्यालयले गरिदिने उनको भनाइ छ।
बाँदरले घरबारी नछाडेपछि अन्नबाली लगाउन छाडेर बेसार खेती गरेको सावित्रा पङ्गेनी बताइन्। मकैको तुलनामा दोब्बरतेब्बर आम्दानी लिने गरी व्यावसायिक रुपमा बेसार खेती सुरु गर्न थालेको उनको भनाइ छ।
मलेङ्ग, डिबिडी, बाहुनडाँडा, मौलाकालिका, सर्पराज टोलमा अन्नबाली बाँदरले खाएर नष्ट पारेपछि खेती लगाउन छाडेका जमीन अहिले बेसारले हराभरा बनेका छन्।
परीक्षणका रुपमा लगाइएको बेसार खेती राम्रो हुँदै गएको र अर्को वर्ष थप व्यवस्थित तरिकाबाट खेती गर्न कृषकलाई सहयोग गरिने वडासचिव गीता पौडेलले बताइन्।
बेसार खेती लगाउन वडा नं ७ को कार्यालयले सहयोग गरेपछि गाउँ छाडेर बेँसी झरेका कृषक पनि पहिले खेती गर्दै आएका जग्गामा बेसार लगाउन थालेका छन्।
बारीमा लगाएका अन्नबाली, फलफूल, घरमा राखिएका अनाज खाएर नष्ट पारेपछि कतिपयले बस्ती नै छाडेर तल्लो क्षेत्रमा बसाई सर्न बाध्य भएका हुन्।
बारीका पाटाभरी मकै लगाएर राम्रै आम्दानी गर्ने यदुनाथप्रसाद पङ्गेनीले बाँदरले सताएपछि पुरानो थाकथलो नै छाडेर खेतमा बसोबास गर्दै आएका छन्।
वडा कार्यालयले बेसार खेतीका लागि बीउ सहयोग गरेपछि करीब दुई रोपनी क्षेत्रफलमा उनले बेसार लगाएका छन्।
अर्को वर्ष बाँझै राख्ने विचार बनाएका जग्गाभरी पनि बेसार लगाउने उनको सोच छ। रासस
