९० वर्ष पुरानो मोटरसाइकल ब्रान्ड 'जावा' मंगलबारबाट नेपाली बजारमा भित्रिएको छ। जावाका २ वटा मोडलका ४ संस्करणका बाइक नेपाल बजारमा भित्रिएका हुन्।
जावालाई नेपालमा अग्नि ग्रुप अन्तर्गतको अग्नि मोटोइंकले ल्याएको हो। कम्पनीले यसअघि नेपालमा महिन्द्राका प्यासेन्जर गाडी बिक्री वितरण गर्दै आइरहेको छ।
चेकोस्लोभाकियामा ९० वर्षको इतिहास बोकेको जावाका मोटरसाइकल क्लासिक, राम्रो इन्जिन क्षमता तथा अब्बल डिजाइनका कारण चर्चित छन्।
अग्नि मोटोइंकले नेपालमा हाल २९३ सिसि इन्जिन क्षमताका 'जावा' र 'जावा-४२' मोडल भित्र्याएको हो।
जावाको सिंगल च्यानल एबिएसको मूल्य ६ लाख ४८ हजार ५ सय रूपैयाँ तोकिएको छ। त्यस्तै डुअल च्यानल एबिएसको ६ लाख ७६ हजार ५ सय रूपैयाँ पर्छ।
जावा-४२ को सिंगल च्यानल एबिएसको मूल्य ६ लाख २० हजार तोकिएको छ भने डुअल च्यानल एबिएसको ६ लाख ४८ हजार रूपैयाँ निर्धारण गरिएको छ।
यी दुई मोडलका चार संस्करणबाहेक कम्पनीले अर्को मोडल 'पेराक' को पनि बुकिङ चाँडै खोल्दै छ।
कम्पनीका अनुसार जावा बाइक अहिले तीन रङमा उपलब्ध छ- कालो, मरून (कलेजी) र खरानी (ग्रे)।
त्यस्तै जावा-४२ भने ६ रङमा उपलब्ध छः सुगा रङ, आकाशे निलो, गाढा हरियो, गाढा निलो, रातो र चम्किलो निलो। यी रङलाई कम्पनीले विभिन्न नाम दिएको छ।
यो ब्रान्डले भारतमा समेत राम्रो ख्याती कमाइरहेको छ। सन् १९६० दशकमा यो बाइक भारतीय बजारमा प्रवेश गरेको थियो। यसले हालसम्म १ सय २० ओटा देशमा बजार बिस्तार गरिसकेको कम्पनीले जनाएको छ।
