राष्ट्रिय गौरवको योजना अन्तर्गत पोखरा क्षेत्रीय अन्तर्राष्ट्रिय विमानस्थलको निर्माण कार्य अन्तिम चरणमा पुगेको छ।
अबको ६ महिना विमानस्थल निर्माण कार्य सम्पन्न हुने बताइएको छ।
यही महिनाभित्र निर्माण सम्पन्न हुनुपर्ने भए पनि कोरोनाका कारण आयोजना पर धकेलिएको हो।
गत आर्थिक वर्ष २०७६/७७ मा ६१ प्रतिशत भौतिक प्रगति भएको थियो।
गत वर्ष समेत कोरोनाका कारण निर्माणले गति लिन सकेको थिएन। चालू आर्थिक वर्षमा केही गति लिएको निर्माण कार्यले फेरि आएको कोरोनाको दोस्रो लहरका कारण निषेधाज्ञा हुँदा कामले गति लिन भने सकिरहेको थिएन।
मे महिनामै विदेशी जनशक्तिले आएर विमानस्थल अवलोकन गर्ने योजना रहेकोमा कोभिड दोस्रो लहरका कारण रोकिएको थियो।
विदेशबाट आउने जनशक्तिहरू जुलाई/अगस्टसम्ममा आउने व्यवस्था मिलाइएको हुँदा काम निरन्तर भइरहने इन्जिनियर कृष्ण पौडेलले बताए।
५०० जनशक्तिको ठाउँमा कोभिड निषेधाज्ञामा २०० हाराहारीमा जनशक्तिले काम गरिरहेको इन्जिनियर कृष्ण पौडेलले जानकारी दिए।
कोभिडको कारण चिनियाँ जनशक्तिमा समेत कमी आएको छ। हाल चिनियाँ जनशक्ति १६६ जना मात्र निर्माणमा आवद्ध छन्।
चिनियाँ जनशक्ति ३ सयका हाराहारीमा आवश्यक रहेको छ। अहिले फिनिसिङ, लाइट हाल्ने, इलेक्ट्रिफिकेसन, इक्यूवमेन्ट, पाइपलाइन बिच्छ्याउने तथा भित्री सडकका काम भइरहेको छ।
निषेधाज्ञाका कारण निर्माणको १ महिनाको प्रगतिमा कमी आउने उनले बताए।
कुल २२ अर्ब रूपैयाँ चिनियाँ ऋण सहयोगमा विमानस्थल निर्माण भइरहेको छ।
विमानस्थल निर्माण सन् २०२१ जुलाई १० सम्म सक्ने गरी सम्झौता भएको थियो। यसअघि पोखरा अन्तर्राष्ट्रिय विमानस्थल ६ महिना अघि नै सम्पन्न गर्ने लक्ष्य रहेको थियो।
हाल विमानस्थल निर्माणले अपेक्षित सकेको गति लिन सकेको छैन। निर्माण सम्पन्न मिति समेत २०२१ डिसेम्बरका लागि सारिएको इन्जिनियर पौडेलले जानकारी दिए।
विमानस्थल निर्माण सन् २०१७ को नोभेम्बर महिनादेखि सुरू भएको हो।
हालसम्म रन वे, ट्याक्सी पार्किङ, टर्मिनल भवन, एप्रोन (यात्रु जहाजमा चड्ने र ओलेने स्थान), नाला निर्माण, ह्याङगर निर्माण लगायतका काम भइसकेका छन्।
पोखरा अन्तर्राष्ट्रिय विमानस्थलको टर्मिनल भवन १४ हजार स्क्वायर मिटरमा बन्नेछ।
८ हजार स्क्वायर मिटर अन्तर्राष्ट्रिय उडानका लागि र ६ हजार स्क्वायर मिटर आन्तरिक उडानका लागि गरी १४ हजार स्क्वायर मिटरको टर्मिनल भवन निर्माण हुन लागेको हो।
