नेशनल पेमेन्ट स्वीचको पहिलो चरणमा एनसिएचएल र राष्ट्रिय वाणिज्य बैंकबीच बुधबार औपचारिक रुपमा सम्झौता भएको छ।
बैंकले आफ्नो संस्थागत ग्राहकहरुका निम्ति बैंक खाताबाटै डिजिटल भुक्तानी गर्न सकिने गरी कर्पोरेट-पे प्रणालीको समेत शुरु गर्ने भएको हो।
उक्त सम्झौता पत्रमा राष्ट्रिय वाणिज्य बैंक लि. का उप कार्यकारी अधिकृत देवेशप्रसाद लोहनी तथा नेपाल क्लियरिङ्ग हाउस लिमिटेडका प्रमुख कार्यकारी अधिकृत नीलेशमान सिंह प्रधानले हस्ताक्षर गरेका छन्।
यस सम्झौतापछि राष्ट्रिय वाणिज्य बैंकले रिटेल पेमेन्ट स्वीचअन्तर्गत नेपाल-क्युआर स्ट्याण्डर्ड बमोजिम नेपाल-पे क्युआर तथा इन्टरनेटवर्क क्युआर, डाइरेक्ट डेबिट रिक्वेस्ट-टु-पे तथा इ-म्यान्डेटका उपकरणहरु, विभिन्न भुक्तानीका लागि बिलर गेटवेमार्फत अन्तरआबद्धता तथा पिएसओ सेटलमेन्ट लगायतका भुक्तानी उपकरणहरु प्रयोग गर्न सक्नेछन्।
उक्त स्वीच रिटेल भुक्तानीको प्राथमिक पूर्वाधारको रुपमा रहेर विभिन्न रियल टाइम, नन-रियल टाइम तथा ओपन एपिआइका मार्फत बैंकले आफ्ना ग्राहकलाई अन्य थप सेवा पनि प्रदान गर्न सक्नेछन्।
बैंकले आफ्ना व्यावसायिक ग्राहकहरुलाई डिजिटल प्ल्याट्फर्मको रुपमा कर्पोरेट-पे प्रणाली उपलब्ध गराउन सक्छन्। उक्त प्रणालीमार्फत बैंकमा नगई आफैले फण्ड ट्रान्स्फर, तलब भुक्तानी, भेन्डर पेमेन्ट, सरकारी राजस्व भुक्तानी लगायतका अन्य विभिन्न व्यावसायिक भुक्तानीहरु खाताबाटै सजिलै गर्न सक्नेछन्। साथै कनेक्ट आइपिएस अथवा नसिएचएल–आइपिएसमा रियल-टाइम वा नन-रियलटाइममा भुक्तानी कारोबारहरु गर्न सकिनेछन्।
कर्पोरेट-पेमा आबद्ध हुनका लागि ग्राहकले बैंकमा सम्पर्क गर्नुपर्ने हुन्छ। स्विकृती लगायतका आवश्यक प्रकृया पूरा गरी बैंकबाट सो सेवा प्राप्त गर्न सकिनेछ।
यसपछि भने ग्राहकका प्रयोगकर्ताहरु आफैले तोकिएको सीमा कारोबारभित्र कुनै पनि भुक्तानीहरु बैंकको प्रत्यक्ष संलग्नता बिना नै गर्न सक्ने बताइएको छ।
यस्तो शुरुआतले बैंकका ग्राहकहरुलाई थप सेवा सुविधा प्रदान गर्नेे विश्वास गरिएको छ। हाल नेशनल पेमेन्ट स्वीचमा ३४ वटा बैंक/वित्तिय संस्था र १ भुक्तानी प्रणाली प्रदायक गरी जम्मा ३५ वटा संस्था आबद्ध रहेका छन्। त्यसैगरी, कर्पोरेट–पे प्रणालीमा हाल ३५ वटा बैंक/वित्तिय संस्थामार्फत उपलब्ध रहेको छ।
