नेकपा (माओवादी केन्द्र)का वरिष्ठ नेताहरू कृष्णबहादुर महरा, वर्षमान पुन ‘अनन्त’ र ओनसरी घर्तीमगरलाई लक्षित गरि बम प्रहार भएको छ।
शुक्रबार अपरान्ह सुलीचौरबाट लिबाङ जाँदै गरेका माओवादी केन्द्रका वरिष्ठ नेताहरुलाई लक्षित गरी रोल्पा नगरपालिकाको सातदोबाटो र लिबाङको बीचमा पर्ने भदौरे जंगलमा अपरान्ह साढे १२ बजे दुई वटा बम विस्फोट गराईएको हो ।
जंगलबाट प्रहार गरिएको बम नेताहरू सवार गाडीभन्दा १० मिटर जंगलतिर फिस्फोट भएका थिए। बम विस्फोटले कुनै क्षति भएको छैन। उप्रधानमन्त्री समेत रहेका वरिष्ठ नेता महरा, वाम गठबन्धनबाट प्रतिनिधिसभामा रोल्पाबाट उम्मेदवार रहेका अर्का वरिष्ठ नेता अनन्त र निवर्तमान सभामुख घर्ती चुनावीसभालाई सम्बोधन गर्न सुलीचौरबाट लिबाङ जाँदै थिए।
नेताहरू सकुशल लिबाङ पुगेका छन्। अहिले बम विस्फोट भएको एरियामा घेराबन्दी गरेर प्रहरीले आक्रमणकारीहरुको खोजी गरिरहेको छ। ‘हामी अहिले घेराबन्दी गरेर आक्रमणकारीहरुको खोजी गरिरहेका छौँ’, प्रहरी निरीक्षक सुदर्शन पन्थीले भने । प्रहरीले बम नेकपाका कार्यकर्ताहरुले विस्फोट गराएको दावि गरेको छ।
