फागुन पहिलो साता प्रतिनिधि सभाको अन्तिम मत परिणाम : आयोग

सेतोपाटी संवाददाता

काठमाडौं, माघ २३

निर्वाचन आयोगले प्रतिनिधि सभाको निर्वाचनको मत परिणाम फागुनको पहिलो हप्ताभित्रै राष्ट्रपति समक्ष पेश गर्ने जनाएको छ।

आयोगले मंगलबार पत्रकार सम्मेलन गरि दलहरूले तोकिएकै समयमा समानुपातिकको सूची उपलब्ध गराउने अपेक्षा समेत व्यक्त गरेको छ।

प्रमुख आयुक्त अयोधीप्रसाद यादवले ३ प्रतिशत थ्रेसहोल्ड कटाउने दलहरूलाई समानुपातिकको सिट बाँडफाँट गर्ने जानकारी दिए। आयोगले राष्ट्रिय सभाको निर्वाचन परिणाम प्राप्त भएपछि दलहरूले ३३ प्रतिशत महिला सहभागिताको सुनिश्चितता गर्ने गरि बन्दसूचीबाट नाम छान्न दलहरूलाई पत्राचार गर्नेछ।

आयोगले यसअघि नै समानुपातिक निर्वाचन कार्यविधि संशोधन गरि दलहरूले तीन दिनमा नाम सिफारिस गर्नुपर्ने र बिग्रिएमा दुई दिनमा सच्याउनुपर्ने प्रावधान गरिसकेको छ।

‘सबै तयारी र प्रक्रिया पूरा गरी प्रतिनिधिसभा सदस्यको सबै निर्वाचन परिणाम फागुनको पहिलो हप्ताभित्रै सम्माननीय राष्ट्रपति समक्ष पेश गर्न आयोग दृढ सङ्कल्पित रहेको जानकारी यसै पत्रकार सम्मेलनमार्फत सबै सरोकारवालालाई गराउन चाहान्छु’, प्रमुख आयुक्तले जारी गरेको विज्ञप्तिमा उल्लेख छ।

प्रकाशित मिति: मंगलबार, माघ २३, २०७४ १४:००

सिफारिस