सूचना उपलब्ध नगराएको भन्दै दोस्रो पटक गोविन्द केसीले दिए निवेदन

सेतोपाटी संवाददाता

काठमाडौं, माघ २५

डाक्टर गोविन्द केसीले गोपाल पराजुलीको नागरिकता र त्यसको प्रतिलिपि सम्बन्धी जानकारी माग्दै दोस्रोपटक जिल्ला प्रशासन कार्यालय काठमाडौंमा निवेदन दिएका छन्।

उनले सूचनाको हक अन्तर्गत उक्त निवेदन दिएका हुन्। प्रधानन्यायाधीश जस्तो व्यक्तिको नागरिकता र जन्ममिति विवादमा परेको भन्दै त्यसको आधिकारिक अभिलेखसम्बन्धी सूचना माग्दै डाक्टर केसी, अधिवक्ता ओम प्रकाश अर्याल लगायतले निवेदन दिएका हुन्।

पहिलोपटक दिएको निवेदनको जवाफमा जिल्ला प्रशासन कार्यालयले पराजुलीसम्बन्धी अभिलेख सर्वोच्च अदालत पठाएकोले उतैबाट लिन भनेको थियो। पराजुली भ्रष्ट र माफिया भएकाले राजीनामा मागेपछि सर्वोच्च अदालतले उनलाई अदालतको अवहेलना सम्बन्धी मुद्दा लगाएको छ।

त्यहि मुद्दाको सुनुवाईमा डाक्टर केसी र उनका वकिलले प्रधानन्यायाधीशको नागरिकता, उमेर र शैक्षिक प्रमाणपत्रबारे पनि प्रश्न उठाएर छानबिनको माग गरेका थिए। सर्वोच्चले पराजुलीको दुवै नागरिकता र शैक्षिक प्रमाणपत्र मगाएको छ।

डाक्टर केसी उक्त मुद्दाका एक पक्ष भएकोले आफूले सर्वोच्च अदालमा पठाएको मिसिलबाटै सूचना लिन जिल्ला प्रशासनले भनेको हो। डाक्टर केसीले भने कसैको दबाब प्रभावमा नपरी आफूले कानून बमोजिम मागेको सूचना दिन माग गर्दै फेरि निवेदन दिएको बताए।