पूर्वन्यायाधीश सिंहको शोक मनाउन सर्वोच्चका सबै इजलास स्थगित

सेतोपाटी संवाददाता

काठमाडौं, फागुन २१

सर्वोच्च अदालतका पूर्वन्यायाधीश राम नगिना सिंहको निधन भएपछि आज सर्वोच्च अदालतले कुनै पनि इजलास नबस्ने निर्णय गरेको छ।

न्यायाधीशहरूको पूर्ण बैठकले सिंहको मृत्युमा शोक मनाउन आज इजलास नबस्ने निर्णय गरेको सर्वोच्च अदालतका सञ्चार विज्ञ किशोर पौडेलले सेतोपाटीलाई जानकारी दिए।

अन्य अदालतमा भने इजलासहरू सुचारु नै छन्। सर्वोच्च अदालतमा प्रशासनिक काम कारवाही भैरहेको पौडेलले बताए। पूर्वन्यायाधीश सिंहको हिजो निधन भएको थियो।

उनको शोक मनाउन सर्वोच्चले आजका सबै इजलास स्थगित गरेको छ। कान्तिपुरको बयान पनि स्थगित भएको पौडेलले जाकारी दिए। कान्तिपुरले न्यायाधीश डम्बरबहादुर शाही र बमकुमार श्रेष्ठको इजलासमा हिजोदेखि बयान दिइरहेको छ।

प्रधानन्यायाधीश गोपाल पराजुलीका ४ वटा जन्ममिति, विवादित नागरिकता लगायत विषयमा लेखेका समाचारले अदालतको अवहेलना भएको भन्दै कान्तिपुरका सञ्चालक र पत्रकार विरुद्ध मुद्दा परेको थियो।

सो मुद्दामा आइतबार कान्तिपुरकी प्रबन्ध निर्देशक स्वस्तिका सिरोहियाले बयान दिएकी थिइन्। सञ्चालक कैलाश सिरोहिया, प्रधानसम्पादक सुधीर शर्मा र समाचारदाता कृष्ण ज्ञावलीको बयान बाँकी थियो। कान्तिपुरको बयान पनि भोलिलाई सरेको छ।

प्रकाशित मिति: सोमबार, फागुन २१, २०७४ १२:१०

सिफारिस