राष्ट्रपतिमा विद्यादेवी भण्डारी निर्वाचित भएकी छिन्। राष्ट्रपति चयनका लागि आज भएको निर्वाचनमा उनी दुई तिहाई भन्दा ठूलो मतभार सहित विजयी भएकी हुन्। उनले ३९ हजार २ सय ७५ मत प्राप्त गरेकी हुन्। भण्डारीकी निकटतम प्रतिद्वन्द्वी नेपाल कांग्रेसकी उम्मेद्वार कुमारी लक्ष्मी राईले ११ हजार ७ सय ३० मतभार प्राप्त गरिन्।
निर्वाचनको मतपरिणामको आधिकारिक घोषणा हुन भने बाँकी छ।
भण्डारीलाई संसदको सबैभन्दा ठुलो दल नेकपा एमालेले उम्मेद्वार बनाएको थियो। उनी संविधान घोषणा पछि २०७२ कात्तिक ११ गते राष्ट्रपति चयन भएकी थिइन्। त्यतिबेला रुपान्तरित संसदले उनलाई राष्ट्रपति चयन गरेको थियो।
राष्ट्रपति हुनु अघि उनी नेकपा एमालेको उपाध्यक्ष थिइन्। त्यसअघि उनले २०६६ सालमा रक्षा मन्त्रालयको जिम्मेवारी सम्हालेकी थिइन्। भण्डारी एमाले नेता मदन भण्डारीकी श्रीमति हुन्। तत्कालिन अवस्थामा मालेबाट भातृ संगठनमा राजनीतिमा लागेकी उनले मदन भण्डारीसँग २०३९ सालमा विवाह गरेकी थिइन्। २०५० सालमा श्रीमानको रहस्यमय दुर्घटनामा निधन भएपछि उनी राजनीतिमा थप सक्रिय भइन्। उनले काठमाडौंको उप निर्वाचनमा उम्मेद्वारको रुपमा खडा भएर प्रतिनिध सभा सदस्य निर्वाचित भइन्।
२०५४ सालमा उनी एमालेको केन्द्रीय सदस्य निर्वाचित भइन्। त्यसपछि लगातार पार्टी केन्द्रीय राजनीतिमा संलग्न हुँदै एमाले उपाध्यक्षसम्म बनिन्। उनी २०५४ सालमा जनसंख्या तथा वातावरण मन्त्री समेत नियुक्त भएकी थिइन्।
राज्यको हरेक अंगमा ३३ प्रतिशत प्रतिनिधित्वका लागि भण्डारीले महिला आन्दोलनको नेतृत्व गरेकी थिइन्। उनकै प्रस्तावमा २०६२/६३ पछि पुर्नस्थापित संसदले ३३ प्रतिशत सम्बन्धि प्रस्ताव सर्वसम्मतले पारित गरेको थियो। हाल नेपालको संविधानले समेत राज्यका हरेक अंगमा एक तिहाई महिला प्रतिनिधित्वको व्यवस्था गरेको छ।
