नेकपा एमाले र माओवादी केन्द्रबीच एकताका लागि आवश्यक अन्तरिम राजनीतिक प्रतिवेदन तयार भएको छ।
प्रतिवेदन तयारीका लागि गठन भएको कार्यदलले प्रतिवेदन टुङ्गो लगाएको हो। यसअघि नै प्रतिवेदनको मस्यौदा तयार गरेर समितिले अध्ययनका लागि नेताहरुलाई वितरण गरेको थियो। प्रतिवेदनमा एमालेले अबलम्बन गर्दै आएको जनताको बहुदलीय जनवाद र नेकपा माओवादीले मान्दै आएको माओवादलाई महाधिवेशनमा बहस गर्ने उल्लेख छ।
‘भाषिक विषय केही मिलाइयो। कार्यदलबाट प्रतिवेदन तयार भयो’, समितिका सदस्य देवेन्द्र पौडेलले सेतोपाटीसँग भने, ‘अब हामी संयोजन समितिमा पेश गर्छौं।‘
एमाले र माओवादीको एकता संयोजन समितिको बैठक सोमबार बस्दैछ। नेकपा एमालेका अध्यक्षसमेत रहेका प्रधानमन्त्री केपी शर्मा ओलीको भारत भ्रमण अघि दुई पार्टीले एकता गर्ने तयारी गरिरहेका छन्।
राजनीतिक प्रतिवेदनले दुई पार्टीको एकताको सैद्धान्तिक आधार र राजनीतिक दिशाबोध गर्ने पौडेलले बताए।
