रेशम चौधरीलाई सपथ नगराएर सरकारले जनताको भावनालाई अपमान गर्‍यो – नेता महतो

सेतोपाटी संवाददाता

काठमाडौं, वैशाख ७

राष्ट्रिय जनता पार्टी नेपालका नेता राजेन्द्र महतोले सांसद रेशम चौधरीलाई सपथ ग्रहण नगराएर सरकारले जनताको भावनाको अपमान गरेको आरोप लगाएका छन्।

राजपाको पहिलो वार्षिक उत्सवका अवसरमा राजधानीमा आयोजित कार्यक्रममा बोल्दै नेता महतोले जनताबाट निर्वाचित सांसदलाई सपथ ग्रहण नगराएर जनताको भावनाको अपमान गरेको आरोप लगाएका हुन्।

‘चुनाव लड्न पाउँछ भने जनताले चुनिदिएपछि त्यसलाई सपथ गराउने दायित्व कसको? सरकार वा संसदको होइन?,’ नेता महतोले प्रश्न गरे, ‘कि मुद्दा लागेको मानिसले चुनावै लड्न नपाउने कानुन बनाउनुपर्छ। होइन भने जनताको म्यान्डेडलाई सम्बोधन गर्ने सरकारको दायित्व हो। त्यसैले चौधरीलाई सपथ गराउनुपर्छ र प्रमाणपत्र दिएर बाँकी प्रकृया अगाडि बढाउनुपर्छ।’

चौधरी २०७२ भदौ ७ मा कैलालीमा भएको थरुहट आन्दोलनका क्रममा एसएसपीसहित ७ सुरक्षाकर्मीको हत्या भएको घटनाका मुख्य आरोपी हुन्।

उनी कैलाली–१ बाट प्रतिनिधिसभा निर्वाचित भएका थिए। भूमिगत रूपमै चुनाव लडेका उनले गत फागुन १४ अदालतसमक्ष आत्मसर्मपण गरेका थिए।

प्रकाशित मिति: शुक्रबार, वैशाख ७, २०७५ १८:२७

सिफारिस