सूचना माग्दै कर्मचारीले दिए आयोगमा दोस्रोपटक निवेदन

सेतोपाटी संवाददाता

काठमाडौं, वैशाख २६

संघीय मामिला तथा सामान्य प्रशासन मन्त्रालयले स्वेच्छिक अवकाश योजनाको सूचना नदिएपछि कर्मचारीले दोस्रोपटक सूचना आयोगमा निवेदन दिएका छन्।

चैत १३ गतेसम्म मन्त्रालयले अद्यावधिक गरेको कर्मचारीको सूची माग गर्दै स्वेच्छिक अवकाशमा निवेदन दिएका कर्मचारीले सूचनाको हक प्रयोग गरी निवेदन दिए पनि मन्त्रालयले सूचना दिन आलटाल गरेको आरोप कर्मचारीको छ।

सूचना आयोगले मन्त्रालयलाई पत्राचार गर्दै कर्मचारीले मागेअनुसार सूचना दिन भने पनि मन्त्रालयले सूचना नदिएपछि बुधबार फेरि सूचना आयोगमा निवेदन दिनुपरेको प्रधानमन्त्री तथा मन्त्रिपरिषद्को कार्यालयका शाखा अधिकृत मित्रप्रसाद खतिवडाले जानकारी दिए।

‘सूचना आयोगले मन्त्रालयलाई पत्राचार गरी वैशाख २५ गतेसम्म सूचना दिनू भने पनि हामीले सूचना पाएनौं’, खतिवडाले सेतोपाटीसँग भने, ‘ऐनअनुसार नै हामीले स्वेच्छिक अवकाशमा निवेदन दिएका हौं। मन्त्रालयले किन सूचना लुकाएको हो? बुझ्न सकिएन।’

कर्मचारी समायोजन ऐन २०७४ को व्यवस्थाअनुसार ९ हजार ६ सय ५६ जनाले स्वेच्छिक अवकाशमा निवेदन दिएका थिए।

प्रदेश र स्थानीय तहमा कर्मचारी अभाव रहेको भन्दै मन्त्रालयले हालका लागि स्वेच्छिक अवकाश योजना स्थगित भएको बताउने गरेको छ।

‘मन्त्रालयले ऐन मिचेको छ। हामी अदालत जान बाध्य हुन्छौं’, खतिवडाले भने।

सूचना उपलब्ध गराइदिन माग गर्दै कर्मचारीले सूचना आयोग गुहारेका हुन्।