सत्तारूढ नेपाल कम्युनिष्ट पार्टीले स्थायी समिति बैठक वैशाख २५ गतेका लागि डाक्ने निर्णय गरेको छ।
शनिवार साँझ प्रधानमन्त्री निवास बालुवाटारमा बसेको नेकपाको सचिवालय बैठकले स्थायी समिति बैठक डाक्ने निर्णय गरेको प्रवक्ता नारायणकाजी श्रेष्ठले जानकारी दिए।
सचिवालय बैठकमा प्रधानमन्त्री केपी शर्मा ओलीले आत्मआलोचना गरेको श्रेष्ठले बताए। उनका अनुसार बैठकमा अन्य शीर्ष नेताहरूले पनि पछिल्लो समय पार्टीभित्र देखिएको विवादबारे आत्मआलोचना गरेका थिए।
आजको बैठकले उपाध्यक्ष वामदेव गौतमलाई प्रतिनिधि सभामा ल्याउने निर्णय पनि गरेको छ।
त्यसका लागि उपयुक्त समयमा प्रत्यन गरिने निर्णय भएको श्रेष्ठले जानकारी दिए।
'प्रतिनिधि सभामा ल्याउने निर्णयभित्रै वामदेव कमरेड प्रधानमन्त्री बन्ने विषय पनि अन्तरनिहित छ', श्रेष्ठले भने, 'वामदेव गौतमलाई प्रतिनिधि सभामा लैजान पहल गर्ने निर्णय भएको छ।'
प्रवक्ता श्रेष्ठले वैशाख २४ गते सचिवालय बैठक बस्ने पनि बताए।
सरकारले राजनीतिक दल विभाजनसम्बन्धी व्यवस्था खुकुलो बनाएर अध्यादेश ल्याएपछि नेकपाभित्रको आन्तरिक विवाद चुलिएको थियो। प्रधानमन्त्री ओलीइतर पक्षको दबाबमा अध्यादेश फिर्ता भए पनि विवाद भने साम्य भएको थिएन।
अर्का अध्यक्ष पुष्पकमल दाहाल 'प्रचण्ड' र बरिष्ठ नेता माधवकुमार नेपाल समूहले प्रधानमन्त्री ओलीले राजीनामा दिनुपर्ने माग गरेका थिए।
गत बुधबार बसेको सचिवालय बैठक प्रधानमन्त्री ओली कोरोनाभाइरसको महामारी सकिएर अवस्था सामान्य बनेपछि आफूले राजीनामा दिने र उपाध्यक्ष गौतमलाई प्रधानमन्त्री बनाउने प्रस्ताव गरेका थिए।
