सरकारले विभिन्न देशबाट २४ हजार नेपालीलाई स्वदेश फर्काउने भएको छ।
परराष्ट्र मन्त्रालयले कोभिड-१९ संकट व्यवस्थापन केन्द्र (सिसिएमसी)लाई उपलब्ध गराएको स्वदेश फर्काउने सूचीमा विभिन्न ३० देशका २४ हजार १ सय ४८ जना छन्।
जसमध्ये मलेसियाबाट सबैभन्दा बढी ६ हजार ४ सय ३५ जना आउँदैछन् भने लाओसबाट २ जना आउने भएका छन्। सरकारले यसअगाडि विभिन्न १५ वटा प्राथमिकता तोकेर नेपाल फर्किन चाहनेको सूची तयार पार्न सम्बन्धित देशमा रहेका नियोगहरुलाई निर्देशन दिएको थियो।
विभिन्न नियोगहरुबाट प्राप्त संख्या अनुसार अमेरिकाबाट ५ सय ४३, ब्रिटिस टेरीटोरीबाट ४९, क्यानडाबाट ७८, साउदी अरबबाट ३ हजार ३ सय १२, युएईबाट ४ सय १०, बहराइनबाट ३ सय ७२, इजरायलबाट ३९, युगाण्डाबाट १ सय ६१ नेपाली आउने भएका छन्।
नइजेरियाबाट ९७, दक्षिण सुडानबाट १८, सुडानबाट ३१, मोरक्कोबाट ६३, कतारबाट ३ हजार ६ सय ८, थाइल्याण्डबाट ३ सय ५७, सिंगापुरबाट ६१ र कम्बोडियाबाट ४१ जना आउने भएका छन्।
त्यस्तै भियातनमबाट ४, जापानबाट ९ सय १६, कोरियाबाट २ सय ८२, बंगलादेशबाट १ सय ८०, श्रीलंकाबाट ३६,पाकिस्तानबाट १ सय २५, डेनमार्क, नर्वे, स्विडेन र फिनल्याण्डबाट ७६,ओमनबाट ६ सय ५६, साइप्रसबाट ४ सय ७१, कुबेतबाट २ हजार ९ सय ९१, माल्दिभ्सबाट ७ सय २४ र अष्ट्रेलियाबाट १ हजार ३ सय रहेका छन्।
यसअघि युएईबाट १ सय ६७ र म्यानमारबाट २६ नेपाली नेपाल आइसकेका छन्।
यसैबीच आज राति अष्ट्रेलियाबाट ११ जना नेपाली आउँदैछन् भने बुधबार कुवेतबाट ३ सयसम्म नेपाली आउने सिसिएमसी स्रोतले सेतोपाटीलाई बतायो। त्यस्तै युएईबाट भने बिहीबार आउँदैछन्।
‘अष्ट्रेलिया र कुवेतबाट आउनेको मोटामोटी संख्या भनिएको छ तर को को आउँदैछन् र कुन जहाजबाट आउँदैछन् भनेर जानकारी आइसकेको छैन’ सिसिएमसी स्रोतले भन्यो 'युएईबाट बिहीबार २ वटा फ्लाइट हुने सूचना आएकाे छ, तर विस्तृत जानकारी आएकाे छैन।'
प्रधानमन्त्री कार्यालयका सचिव नारायणप्रसाद बिडारीले सूची तयार भइसकेपछि अब परराष्ट्र र पर्यटन मन्त्रालयले उडान सम्बन्धित देशबाट उडान अनुमति लिने बताए।
‘आउन चाहनको सूची तयार भएको छ अब उडानको व्यवस्था गरेर नेपाली ल्याउने काम सुरू गर्छौं,’ बिडारीले भने।
