पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले एमसीसी परियोजनाका विषयमा आफूहरूले गरेको बुद्धिमतापूर्ण निर्णयले अहिलेको सत्तारूढ गठबन्धन जोगिएको बताएका छन्।
एमसिसी परियोजना अनुमोदन गर्ने सन्दर्भमा गठबन्धनकै भविष्य के हुने हो भन्ने चर्चा चलिरहेका बेला सकारात्मक समाधान गर्न आफूहरू सफल भएको उनले बताए।
पार्टीको आन्तरिक कार्यक्रमलाई सम्बोधन गर्न शुक्रबार सुर्खेत आएका प्रचण्डले विमानस्थलमा पत्रकारसँग कुरा गर्दै भने, ‘एमसिसीबारे समस्याले देशमा गम्भीर प्रकृतिको असर पर्छ कि भन्ने जुन चिन्ता सर्वत्र छाएको थियो, हामीले अन्ततः सकारात्मक, रचनात्मक र बुद्धिमतापूर्ण तरिकाले समाधान निकाल्यौं, यसले अहिलेको हाम्रो गठबन्धन जोगिएको छ।’
एमसिसी परियोजनाका कारणले गठबन्धन टुट्ने वा देशको राजनीति नै दुश्चक्रमा फस्ने चर्चा चलिरहेका बेला आफूहरूले गरेको व्याख्यात्मक घोषणा सकारात्मक समाधानको आधार बनेको अध्यक्ष प्रचण्डले दाबी गरे।
‘एउटा परियोजनाका कारण देशको राष्ट्रिय राजनीति र समाज नै विभाजित हुने त होइन भनेर मैले सार्वजनिक रूपमा पनि पहिले भनेको थिएँ, अन्ततः हामीले अन्तर्राष्ट्रिय कानुनी मान्यता पाएको व्याख्यात्मक टिप्पणी गरी समाधान गर्यौं,’ उनले भने।
एमसिसी सम्झौताकै एक अंगका रूपमा हुनेगरी तयार पारिएको आफूहरूले तयार पारेको व्याख्यात्मक घोषणालाई एमसिसीको पनि समर्थन प्राप्त भएकाले महत्व झन् बढेको उनको भनाइ छ।
आफूले बिहीबार अर्थ मन्त्रालय र प्रधानमन्त्रीलाई एमसिसीबाट औपचारिक पत्र प्राप्त गर्ने र जवाफ पठाउने प्रक्रिया सुरू गर्न भनेको अध्यक्ष प्रचण्डले बताए।
एमसिसीका कारण चर्चामा आएको गठबन्धन अहिले निर्वाचनसम्मका लागि सुदृढ बन्दै गएकाले निर्वाचनभन्दा अझ परसम्म पनि गठबन्धन जाने विश्वास उनले व्यक्त गरे।
‘एमसिसीका कारण माओवादी नै विभाजन हुने हो कि भन्ने पनि प्रश्न उठेको थियो, तर केन्द्रीय समितिबाट पार्टीलाई एकताबद्ध गरी एउटै विचारका साथ निर्वाचनमा जाने वातावरण तयार पारेका छौं,’ प्रचण्डले भने, ‘एमसिसी पारित गर्ने विषयमा उठेका केही मतभेदहरू पनि एउटै फोरमबाट निष्कर्षमा पुग्नेगरी हामी अगाडि बढेका छौं।’
उनले यसअघि एमालेसँग गरिएको एकता टुट्नुमा मुख्य राजनीतिक नेतृत्व नै गलत हावी भएको बताए। एमालेसँग कम्युनिष्ट आन्दोलनलाई एकताबद्ध गरी देशको राजनीतिलाई स्थायित्व दिने उद्देश्यले एकता गरिए पनि पार्टीको मूल नेतृत्वले नै संविधानमाथि घात गर्न थालेपछि माओवादी त्यसको विपक्षमा खडा भएको उनले बताए।
अहिले माओवादी देशको राजनीतिलाई कतातिर लैजाने भन्ने कुरामा निर्णायक रहेको प्रचण्डको दाबी छ।
