प्रदेश-१ सरकारले प्रदेश योजना आयोगको उपाध्यक्षमा डा. पूर्ण लक्समलाई नियुक्त गरेको छ।
शेरधन राईको पालामा नियुक्त सुबोधराज प्याकुरेल मुख्यमन्त्री राईसँगै पदमुक्त भएपछि सो पद रिक्त थियो। सरकारले त्यसबेला सदस्य रहेका पाँचथरका डा. लक्समलाई उपाध्यक्ष नियुक्त गरेको हो।
सोमबारको मन्त्रीपरिषद बैठकले आयोगका सदस्यहरू पनि नियुक्त गरेको छ। सदस्यहरूमा डा. ज्ञानेन्द्रबहादुर कार्की (संखुवासभा), नारायण कोइराला (सुनसरी), प्रकाश राई (भोजपुर) र अन्जु खड्का मोरङलाई नियुक्त गरेको छ।
प्रदेश १ सरकारले प्रदेश खेलकुद बोर्ड उपाध्यक्ष बाबा मेन्याङ्बो र सदस्यसचिव कृष्ण (पर्शुराम) बस्नेतलाई बर्खास्त गरेको छ। सरकारलाई असहयोग गरेको, खेलकुद क्षेत्रमा कुनै काम नगरेको भन्दै उनीहरूलाई हटाएको हो।
पर्शुराम बस्नेत। सोमबारको मन्त्रिपरिषद बैठकले मेन्याङ्बो र बस्नेतलाई पदमुक्त गरेको हो। तत्कालीन मुख्यमन्त्री भीम आचार्यले गएको असोज २४ गते प्रदेश खेलकुद बोर्डको उपाध्यक्ष, सदस्यसचिव र सदस्यहरू नियुक्त गरेका थिए। प्रदेश खेलकुद ऐन अनुसार बोर्ड पदाधिकारीको कार्यकाल चार वर्षको हुन्छ।
एमाले कोटामा नियुक्त उनीहरूलाई सरकारले ६ महिनामै हटाएको हो। राजेन्द्र राई मुख्यमन्त्री बनेर नयाँ मन्त्रिपरिषद बनेपछि सामाजिक विकास मन्त्री राजन राईले माघ अन्तिममा मेन्याङ्बो र बस्नेतलाई तीन दिने स्पष्टीकरण सोधेका थिए।
उनीहरूको स्पष्टीकरण चित्तबुझ्दो नभएको सरकारले बताउँदै आएको थियो। नयाँ सरकार बनेलगत्तैदेखि उपाध्यक्ष र सदस्यसचिव भूमिकाविहीन पारिएका थिए। सरकारले बोर्डको बजेट रोक्का गरिदिएको छ।
पर्शुराम बस्नेतको सदस्यससचिव बन्ने योग्यता नपुग्ने भन्दै सरकारले स्पष्टीकरण सोधेको थियो।
प्रदेश खेलकुद बोर्डको सदस्य सचिव बन्न कम्तीमा १० वर्ष खेलकुद क्षेत्रमा योगदान दिएको र असल चालचलन भएको हुनुपर्ने कानुनी प्रावधान छ।
बस्नेत आपराधिक गतिविधिमा संलग्न रहेको आरोप लाग्दै आएको छ। उनीविरूद्ध अकुत सम्पत्ति आर्जन गरेको मुद्दामा सम्पत्ति शुद्धिकरण विभागले मुद्दा दायर गरेको थियो। तर, उनले सो मुद्दामा सफाइ पाइसकेका छन्।
प्रदेश सरकारले उनीहरुलाई बर्खास्त गरे पनि नयाँ पदाधिकारी नियुक्त भने गरेको छैन।
सरकारले प्रदेश प्रशिक्षण केन्द्रको कार्यकारी निर्देशक पदमा विष्णुकुमार कार्कीलाई नियुक्त गरेको छ। उनी अवकाश प्राप्त सरकारी कर्मचारी हुन्। सरकारले यातायात व्यवस्था तथा सञ्चारमन्त्री उपेन्द्र घिमिरेलाई सरकारको प्रवक्ता तोकेको छ।
