विवादका बीच कर्णाली प्रदेशको उद्योग, पर्यटन, वन तथा वातावरण मन्त्री बनेका माओवादीका छिरिङ डम्डुल लामा (कार्चेन)को पद सोमबार सकिएको छ।
गएको २०७८ माघ २३ गते मन्त्रीमा नियुक्त भएका गैरसांसद लामाको पदावधि आजदेखि सकिएको हो।
सांसद प्रदेश वा संघमा सांसद नभएको व्यक्ति ६ महिना मन्त्री बन्न पाउने संवैधानिक व्यवस्था छ।
सोही व्यवस्थामा टेकेर माओवादी कर्णाली प्रदेश सभा दलले गरेको सिफारिसका आधारमा मुख्यमन्त्री जीवनबहादुर शाहीले लामालाई उद्योगमन्त्री बनाएका थिए।
तिब्बतबाट मूर्ति चोरी गरेर सजाय पाएका लामालाई मन्त्री बनाइएपछि समयसम्म प्रमुख प्रतिपक्षी दल एमालेले असहमति जनाएको थियो। उनलाई नियुक्ति गर्ने विषयमा सत्ता गठबन्धन दलहरूबीच नै मत बाझिएको थियो।
विवादका बीच मन्त्री बनेका लामाको पदावधि सकिएपछि उनको ठाउँमा माओवादीबाट नै मन्त्री बन्ने भएका छन्।
नेकपा माओवादी केन्द्रले उद्योगमन्त्री अब कसलाई बनाउने भन्ने विषयमा आज छलफल गरेको थियो। छलफलले नाम सिफारिस गर्न भने सकेन।
नाम सिफारिस गर्ने जिम्मा संसदीय दलका नेता महेन्द्रबहादुर शाहीलाई दिइएको छ।
‘संसदीय दलमा छलफल चलेको हो, खासै निष्कर्ष निस्किएन,’ माओवादी कर्णाली प्रदेश सभा दलका प्रमुख सचेतक कृष्णा शाहले भनिन्, ‘यो जिम्मा दलका नेतालाई दिइएको छ।’
प्रमुख सचेतक शाहका अनुसार अबको बढीमा दुई दिनभित्र मन्त्री बन्ने नाम टुंगो लाग्ने छ।
माओवादीका कर्णालीमा ११ जना सांसदमध्ये मन्त्री बन्न बाँकी तीन जना मात्र छन्। प्रमुख सचेतक जाजरकोटका शाह, रूकुम पश्चिमका रातो कामी र डोल्पाका वीरबहादुर शाही मन्त्री हुन बाँकी छन्।
तीनैमध्ये एक जना अब उद्योग, पर्यटन, वन तथा वातावरण मन्त्री बन्ने देखिएको छ।
