नेपाली कांग्रेसका नेता डा. शेखर कोइरालाले नागरिक स्वतन्त्रता र प्रेस स्वतन्त्रताप्रति कांग्रेस सधैं अडिग रहने बताएका छन्।
कांग्रेसका पूर्वसभापति एवं पूर्वप्रधानमन्त्री स्वर्गीय गिरिजाप्रसाद कोइरालाको १३ औं स्मृति दिवसका अवसरमा नेपाल प्रेस युनियन केन्द्रीय कार्यसमितिले मंगलबार काठमाडौंमा आयोजना गरेको ‘नागरिक स्वतन्त्रताका लागि गिरिजाप्रसाद कोइरालाको योगदान’ विषयक विचार गोष्ठीमा उनले यस्तो बताएका हुन्।
'प्रेस स्वतन्त्रता बिना लोकतन्त्र फस्टाउन सक्दैन। कांग्रेसले सञ्चार क्षेत्र र प्रेस स्वतन्त्रतालाई सधैं सकारात्मक रूपमा हेर्दै आएको छ,' उनले भने।
आगामी केही दिनभित्रै कांग्रेस सरकारमा जान लागेको जानकारी दिँदै उनले कांग्रेसलाई सरकारमा गएर गल्ती गर्ने कुनै छुट नभएको बताए।
नेता डा. कोइरालाले सरकारमा गएर दस दलीय गठबन्धनलाई सफल बनाउने जिम्मा कांग्रेसको भएको उल्लेख गरे। वर्तमान सत्ता गठबन्धनलाई राम्रोसँग सञ्चालन गर्ने जिम्मा कांग्रेसको भएको उनको भनाइ थियो।
कार्यक्रममा कांग्रेस महामन्त्री गगनकुमार थापाले शान्ति प्रक्रियाका बाँकी कामलाई चाँडो टुंगोमा पुर्याउनुपर्ने बताए।
'शान्ति प्रक्रियाका बाँकी काम टुंगोमा पुर्याउन ढिलासुस्ती गरे भविष्यमा यसले थप जटिलता निम्याउन सक्छ। पीडितको भावनामाथि चोट पुर्याउने काम गर्नुहुँदैन,' उनले भने।
शान्ति प्रक्रियालाई पूर्णता दिँदा पीडितको भावनामाथि चोट पुर्याउने र अन्तर्राष्ट्रिय मूल्य, मान्यताविपरीत जान नहुने उनको भनाइ थियो।
महामन्त्री थापाले गिरिजाप्रसाद कोइरालाको नेतृत्वमा सुरू भएको शान्ति प्रक्रिया टुंगोमा पुर्याउने कामको नेतृत्व नेपाली कांग्रेसले नै लिनुपर्ने बताए। गिरिजाप्रसाद कोइराला नेतृत्वको २०४८ सालको सरकारले लिएको आर्थिक नीति र निर्णयकै आधारमा मुलुकको अर्थतन्त्र अहिले पनि चलिरहेको उनको भनाइ थियो।
कांग्रेस सहमहामन्त्री महालक्ष्मी (डिना) उपाध्यायले कांग्रेसभित्र रक्त सञ्चार गर्ने कुशल संगठक गिरिजाप्रसाद कोइराला भएको बताइन्।
'कांग्रेसभित्र बिपी कोइरालाले सिद्धान्त दिनुभयो, गिरिजाबाबुले संगठन विस्तार गर्नुभयो,' उनले भनिन्, 'विद्यार्थी, महिला, तरुण, दलित, जनजाति, मजदुर सबैलाई उत्तिकै माया गर्ने नेता हुनुहुन्थ्यो गिरिजाबाबु।'
कांग्रेस केन्द्रीय सदस्य रामहरि खतिवडाले नेपालको राजनीतिलाई शान्ति प्रक्रियामा लैजान गिरिजाप्रसाद कोइरालाको महत्त्वपूर्ण भूमिका रहेको बताए।
'गिरिजाबाबु सबै राजनीतिक शक्तिलाई सँगै लिएर अगाडि बढ्ने नेता हुनुहुन्थ्यो,' उनले भने।
नेपाल ट्रेड युनियन कांग्रेसका वरिष्ठ उपाध्यक्ष महेन्द्रप्रसाद यादवले नेपालको श्रमिक आन्दोलनलाई अगाडि बढाउन गिरिजाप्रसाद कोइरालाले खेलेको भूमिका महत्त्वपूर्ण रहेको बताए। राष्ट्रिय समाचार समिति (रासस) का कार्यकारी अध्यक्ष एवं नेपाल पत्रकार महासंईका पूर्वअध्यक्ष धर्मेन्द्र झाले प्रेस स्वतन्त्रताका लागि सधैं अगाडि बढ्ने गिरिजाप्रसाद कोइराला शान्ति प्रक्रियाका नायक भएको बताए।
नेपाल पत्रकार महासंघका अध्यक्ष विपुल पोखरेल, महासङ्घका पूर्वअध्यक्षहरू हरिहर विरही, तारानाथ दाहाल र विष्णु निष्ठुरी, नेपाल प्रेस युनियनका पूर्वअध्यक्ष किरण पोखरेल, नेपाल प्रेस युनियनका सल्लाहकार अनिता विन्दु, नेपाल प्रेस युनियनका उपाध्यक्ष नकुल अर्याल, महासचिव दिलिप पौडेललगायतले नागरिक स्वतन्त्रता आन्दोलनलाई अगाडि बढाउन महत्त्वपूर्ण भूमिका खेलेकाका स्वर्गीय कोइराला निडर, निर्भीक र दृढ शक्ति भएको राजनीतिक नेता भएको बताएका थिए।
कार्यक्रममा नेपाल प्रेस युनियनका अध्यक्ष शिव लम्सालले नेपालको पत्रकारिताको विकास र नेपाल प्रेस युनियन स्थापनामा गिरिजाप्रसाद कोइरालाको भूमिका महत्त्वपूर्ण रहेको बताए।
