वैशाख १० को उपनिर्वाचनका लागि सत्ता गठबन्धनको तर्फबाट नेकपा (माओवादी केन्द्र)ले तनहुँ क्षेत्र नं- १ मा दाबी गर्ने भएको छ।
उपनिर्वाचन हुन लागेका बारा-२ र चितवन-२ मा सत्ता गठबन्धनका उम्मेदवारलाई सघाउने निर्णय गरेको माओवादी केन्द्रले तनहुँ-१ भने दाबी गर्ने निर्णय गरेको हो।
'बारा र चितवनमा सत्ता गठबन्धनका उम्मेदवारलाई सघाउने भन्ने छ।तनहुँ-१ को सवालमा भने केही भएको छैन,' माओवादी केन्द्रका सचिव लिलामणि पोखरेलले भने,'तनहुँ-१ मा पार्टीले दाबी गर्ने भन्ने छ, त्यसबारे पार्टीमा छलफल हुन्छ होला।'
माओवादी केन्द्रका अर्का सचिव एवं गण्डकी प्रदेश इन्चार्ज देवेन्द्र पौडेलले तनहुँ-१ मा पार्टीले दाबी गरेको बताए।
'बारा र चितवनमा सत्ता गठबन्धनकै उम्मेदवारलाई सघाउने हो,' पौडेलले भने,'गठबन्धनको बैठकमा तनहुँ-१ हामीले दाबी गर्ने हो। थप निर्णय गठबन्धनले गर्ला।'
तनहुँ-१ मा नेपाली कांग्रेसले गोविन्द भट्टराईलाई उम्मेदवार बनाउने निर्णय गरिसकेको छ। एमालेले सर्वेन्द्र खनाललाई उम्मेदवार बनाउने निर्णय गरेको छ। त्यस्तै राष्ट्रिय स्वतन्त्र पार्टीले स्वर्णीम वाग्लेलाई उम्मेदवार बनाउने निर्णय गरिसकेको छ।
उक्त क्षेत्रमा माओवादी केन्द्रका तर्फबाट तीन जनाले दाबी गरेका थिए। तीमध्ये कोषाध्यक्ष श्रीराम ढकालले आफ्नो दाबी फिर्ता लिइसकेका छन्। दाबी गर्नेमध्येका हेमराज लामिछानेले ओमकुमारी पौडेललाई समर्थ गरेका छन्।
माओवादी केन्द्रीय सदस्य पौडेलले आफ्नो पार्टीले गठबन्धनबाट टिकट नपाए मैत्रीपूर्ण प्रतिस्पर्धा गर्ने बताइन्।
'पार्टी नेताहरूले मलाई तयार रहन भन्नुभएको छ। गठबन्धनको तर्फबाट हामीले पाउनुपर्छ,' उनले भनिन्, 'गठबन्धनमा सहमति नभए हामी मैत्रीपूर्ण प्रतिस्पर्धा गर्ने हो। हाम्रो मत तनहुँ-१ मा १२ हजारभन्दा धेरै छ।'
मंसिरमा भएका निर्वाचनमा तनहुँ-१ बाट निर्वाचन जितेका रामचन्द्र पौडेल राष्ट्रपति भएपछि सो क्षेत्रमा निर्वाचन हुन लागेको हो। त्यो बेला कांग्रेसलाई समर्थन गरेको माओवादी केन्द्रले समानुपातिक तर्फ ७ हजार ३ सय २६ मत ल्याएको थियो। सबैभन्दा धेरै मत कांग्रेसले ल्याएको थियो। उसले २० हजार १ सय ५८ मत ल्याएको थियो। त्यस्तै एमालेले १६ हजार ६ सय ८३ र रास्वपाले १२ हजार ७ सय ७३ मत ल्याएको थियो।
बारा-२ मा गठबन्धनको तर्फबाट जसपाका उपेन्द्र यादव उम्मेदवार बनेका छन्। त्यस्तै जनमत पार्टीका तर्फबाट शिवचन्द्र कुशवाहा र रास्वपाले रमेश खरेललाई उम्मेदवार बनाएको छ। बारा २ बाट चुनाव जितेका रामसहाय प्रसाद यादव उपराष्ट्रपति बनेपछि सो क्षेत्रमा उपनिर्वाचन हुन लागेको हो। एमालेले उक्त क्षेत्रमा कसलाई उम्मेदवार बनाउने भनेर निर्णय गरिसकेको छैन।
त्यस्तै चितवन क्षेत्र नं २ मा सत्ता गठबन्धनका तर्फबाट कांग्रेसका जितनारायण श्रेष्ठ उम्मेदवार बनेका छन्। रास्वपाबाट सभापति रवि लामिछाने उम्मेदवार बनेका छन भने एमालेले रामप्रसाद न्यौपानेलाई उम्मेदवार बनाएको छ। नागरिकतासम्बन्धी विवादमा रास्वपाका रवि लामिछानेको सांसद पद खारेज भएपछि सो क्षेत्रमा उपनिर्वाचन हुन लागेको हो। तीनै क्षेत्रमा उपनिर्वाचनका लागि सोमबार उम्मेदवारी दर्ता गर्ने कार्यसूची छ।
