गत मंसिरमा नेपाली कांग्रेसबाट विद्रोह गरेर स्वतन्त्र उम्मेदवारी दिएका दिनेश कोइरालाले उपनिर्वाचनमा कांग्रेसका उम्मेदवारलाई मतदान गर्न अपिल गरेका छन्।
कोइराला कांग्रेस केन्द्रीय सदस्य थिए। चितवन क्षेत्र नम्बर ३ मा उनले उम्मेदवार हुन आकांक्षा राखे पनि यो क्षेत्र गठबन्धन गर्दा कांग्रेसले नेकपा माओवादी केन्द्रलाई छाडेको थियो। यसपछि कोइरालाले कांग्रेसबाट बिद्रोह गरी स्वतन्त्र उम्मेदवारी दिएका थिए।
पार्टीको निर्देशन नमानेको भन्दै कांग्रेसले कोइरालालाई कारबाही गरेको थियो। कोइराला मंसिर ४ को चुनावमा पराजित भएका थिए। यहाँ उनलाई नेकपा एमालेले पनि समर्थन गरेको थियो। त्यसबेला एमाले उम्मेदवार रामप्रसाद न्यौपानेले उम्मेदवारी फिर्तासमेत लिएका थिए।
तर कोइरालाले आज अपिल जारी गर्दै वैशाख १० को उपनिर्वाचनमा कांग्रेसका उम्मेदवारलाई चितवन २ र तनहुँ १ मा मतदान गर्न आग्रह गरेका छन्।
अहिले एमालेले उपनिर्वाचनका लागि रामप्रसाद न्यौपानेलाई नै उम्मेदवार बनाएको छ।
कोइरालाले वक्तव्य जारी गर्दै उपनिर्वाचनमा कांग्रेसका उम्मेदवारलाई सघाउन मतदातालाई अपिल गरेका छन्।
‘नेपालको राजनीतिक, सामाजिक, धार्मिक, आर्थिक वातावरण सजिलो बाटोमा गइरहेको छैन। अर्थतन्त्रमा सबैभन्दा बढी समस्या देखिएको छ। कांग्रेसले अर्थतन्त्रलाई सही बाटोमा ल्याउन अगुवाइ गर्नुपर्छ,’ कोइरालाले भनेका छन्, ‘तनहुँमा उम्मेदवार बनेका गोविन्द भट्टराई र चितवनमा उम्मेदवार बनेका जितनारायण श्रेष्ठ प्रतिनिधि सभामा पुग्नैपर्ने सशक्त उम्मेदवार हुन्।’
उनले आवेगमा नभई विवेक र वुद्धिमता प्रयोग गर्न मतदातालाई आग्रहसमेत गरेका छन्।
